Pa 10:05 diadomingo mainta a drenta melding for di KIA cu
Gerson Galsirio Martina, naci na Corsou, dia 13 November 1980
a caba di huy.
Mester remarca cu e persona aki ta sintando un condena pa atraco.
Mesora a cuminsa mobilisa tur autoridad necesario pa e buskeda di dicho persona. E criminal aki ademas di ta envolvi den atraco arma ta conoci como un persona hopi violento.
E tin un record como un persona hopi peligroso y violento. Den pasado el a drenta cas di Polis na Bubali y comete atraco y bay den confrontacion te cu e Polis mester a tira marduga pa no wordo mata.
Un otro caso e criminal Gerson Martina a bay bati su pareha y ora cu Polis a bay atende e criminal el a hinca un di e Polisnan den garganta cu sker.
Otro caso tambe Polis a bay duna asistencia pasobra el a lanta cu e mama y ora Polis a yega el a manda un vaas corta un di e polisnan seriamente na su man. Eseynan ta motibonan suficiente pa pueblo no acerca e criminal peligroso aki cu awor a huy di KIA. Polis ta informa cu cualkier ayudo brinda na dicho persona ta castigabel pa nos codigo penal.
Articulo 2:146 di nos codigo penal ta papia di esun cu libera of yuda na liberacion di un persona cu tin un castigo di prison ta castigabel cu maximo 4 aña di prison.
Pa es motibo ta urgi pueblo di Aruba cu si bo por sa algo di su paradero of e sitio cu e ta scondiendo yama nos tiplijn 11141. Bo anonimidad ta wordo garantisa.
