Diamars, e di dos reunion tocante e Eagle LNG a sigui den parlamento di Aruba. Tabata e di dos dia en espera di transparencia.
Miembro di fraccion di AVP den parlamento, mr. Gerlien Croes, a cuminsa na bisa cu nan tabata tin un speransa cu gobierno lo por duna un tiki informacion riba e firmamento di un contracto pa 20 aña entre WEB Aruba NV y Eagle LNG. Ta hopi importante pa subraya e hecho cu parlamento no a haya e informacion aki y Croes ta convenci cu nan lo no hay’e tampoco mas.
Pero mester pone enfasis riba e hecho di con e procedura a cana, cual el a elabora hopi largo durante su disertacion den parlamento. E manera con henter e situacion aki tabata planifica. Tabata tin un aña y mey bezig, cu hopi rumor den prensa. Varios articulo cu tabata sali leu a leu, pero nada en concreto.
Por mira claramente cu gobierno a continua c’un maneho bieu. Nan tin un partner nobo den coalicion y a lastra tur hende den e proceso, den e plan cu nan tabata tin caba.
Awo, cu tur cos ta fiha caba y parlamento ta haci e pregunta necesario, di unda e contract ta, kico e contract ta bisa y ken ta responsabel actualmente pa locual nan ta hinca Aruba aden, niun hende no tin contesta.
Pa un relato mas amplio, lesa TREMPAN di mañan.
