Diamars 19 di februari, studiante di OGM, Gerardi Lanoy, a defende su tesis exitosamente den presencia di su famia y amigonan den Aula di Universidad di Aruba.
Gerardi su investigacion tabata tin un enfoke riba e efectonan cu e ambiente fisico di e luga di trabou por tin pa empleadonan na Aruba riba e ehecucion di trabao.
Gerardi a splica cu compania grandi, manera Apple y Google, a logra mehora e ehecucion di trabao di nan empleadonan door di inverti den un miho ambiente fisico den e luga di trabou. E pregunta general di investigacion tabata: “Con e ambiente fisico di e luga di trabou ta relaciona cu ehecucion di trabao door di empleadonan di un organisacion publico y un organisacion priva na Aruba?”
Pa su investigacion, Gerardi a acerca un organisacion priva, un organisacion publico y investiga e perspectiva di un organisacion di salud corporativo na Aruba. Por medio di varios entrevista, e investigacion a mustra cu en berdad e ambiente fisico den luga di trabou ta afecta ehecucion di trabou di empleadonan den corto y largo plaso. Algun aspecto relevante di e investigacion tabata cu algun factor cu por stimula empleado pa eherce nan trabou mihor ta e importancia di paz y trankilidad pa por eherce trabou intelectual cu ta rekeri concentracion, y flexibilidad di temperatura y luz den lugarnan di trabou. Otro topico emergente tabata e factor di ergonomia y herment adecua por ehempel computer.
Despues di un presentacion, Gerardi a defende su tesis den presencia di e comite di graduacion cu a consisti di Dr. Mieke de Droog como supervisor di tesis, y evaluado Drs. Nadia Dresscher. Drs. A. Proveyer-Groot director di Departamento di Enseñanza tabata presente como miembro externo di e comite di graduacion. E comite a elogia Gerardi pa su investigacion relevante, y su recomendacionnan realistico y constructivo pa e organisacionan concerni.
Den su tempo na Universidad di Aruba, y durante e proceso di su tesis, Gerardi a crece na un nivel academico y personal. Ela desaroya su mes como lider door di su participacion den e ekipo di deporte di Universidad di Aruba y despues como director di e ekipo. Universidad di Aruba, particularmente e departamento di Organization, Governance, and Management, ta felicita Gerardi cu e logro aki y ta desea p’e tur clase di exito den su futuro carera. Pa mas informacion tocante OGM, bishita e pagina di Universidad di Aruba na http://www.ua.aw/OGM y e pagina di Facebook https://www.facebook.com/pages/University-of-Aruba-OGM-Organization-Governance-Management-FAS/
