Directiva y gerencia di Parke Nacional Arikok a tene un conferencia pa asina confirma ceramento di entrada di Shete. Segun presidente di directiva, Fredis Refunjol, a manda un carta na November 2018 pa tur e touroperators y hendenan cu ta haci uzo di e entrada ey.
Di loke por a compronde, no a haya ningun reaccion di e carta y dia 1 di April ta yegando. E fecha cu ta bay cera e entrada ey ta bira un hecho. Si ta asina cu despues cu cera e entrad, dia 1 di April, ta bay keda un periodo di intercesion, unda cu pa dos siman lo tin rangers para eynan pa mustra e hendenan cu bin eynan, cu e entrada ey no ta accesibel mas y mester busca e entrada principal.
Ta den un proceso grandi di reorganisacion, esey ta pa haci e maneho bira mas eficiente y e operacionnan bira mas smooth. E entrada na Shete ta causa hopi destruccion, ta causa hopi influencianan negativo riba e naturalesa.
E tin un impacto di polucion, zonido, stof cu ta afecta e matanan y tambe e ta un parti caminda cu no tin e control manera lo kier tabata tin’e. Directiva ta spera cu via e entrada principal, Conchi ta keda accesibel.
Reorganisacion
E reorganisacion den parke lo ta total, hasta den sistema di directiva. Recientemente a introduci un Conseho di Supervision cu ta wordo precidi pa Fredis Refunjol mes. Helen van der Wal, sr. Jossy Lacle, sr. Daryanani y tambe sr. Norman Kuiperi ta e conseho di supervision. A nombra entre tanto sra. Natasha da Silva como e Conservation manager. a pone un anuncio den corant pa solicita pa un CEO. Tabata tin basta persona cu a reaccion y ta den e proceso awo pa nombra uno, di cual no ta cla ainda cu esey.
Tin plannan di maneho cu ta wordo skirbi. E ta un reorganisacion total. Sr. Lufrido Croes ta encarga cu e parti di mantencion. Por a wak cu e edificio y loke cu ta rond di dje, a bay hopi atras. E ta bezig ta trahando riba e plannan cu ta casi cla. Esaki ta bay costa masha hopi placa, cual e parke tin disponibel, danki na DCNA entre otro. Tin hopi plan y ta spera cu dentro di algun luna tur cos por ta canando manera kier. Y pa fin di aña y comienso di otro aña por tin un parke completamente renoba.
No mester lubida cu minister Oduber a duna e autoridad pa por añadi 16 pida tereno nobo cu ta bay forma parti di parke. Tin bastante desaroyo den parke y tin hopi trabao cu tin cu wordo haci. Tin cu skirbi un beheerplan, con pa run’e, kico e metanan ta, etc. Tin bastante trabao.
Regla y control
E ruta, demarcacionnan pa Conchi lo wordo coregi. Segun Refunjol, tur esaki lo bin den rapport final cu sr. Lufrido Croes lo presenta na e directiva kico mester wordo atendi y con e mester wordo atendi cun’e. Tur esaki lo wordo coregi. E vegetacion, e camindanan, etc. cu ta cerca y rond di Conchi ta decadente. Mester bay comporta un tiki otro y lo bay bin reglanan mas rigido. Ta bay bin control, cual ta para den e maneho nobo.
En principio no lo ta problema si cana. Pero accesibel cu auto of otro vehiculo, ta bay ta limita. Lo defini bon cla, unda por y unda no por.
