Den fin di siman nos a combersa cu comerciante den Caya Grandi cu atrobe ta bati alarma riba e situacion fastioso cu tin den Caya Betico Croes ultimo tempo. Segun minister di Asuntonan Economico, Geoffrey Wever, e ta keda naturalmente algo complica y hopi e spin-off no ta bin inmediatamente. Sin embargo segun minister Wever, gobierno tin plan pa incentivo fiscal den Caya y tin cu laga tur cos bay stap pa stap.
“Den Wilhelminastraat por ehempel e comerciantenan ta wak cu nos ta inverti, awor tin dos comerciante cu ta bay haci un inversion. Ta bay bin un bakery nobo, eynan mes casi na fin di Wilhelminastraat den e proyecto cu nos a drecha, y tin otro proyecto den preparacion. Esey ta den horeca y bo ta wak toch cu tin comerciante cu si ta kere den e vision y nan kier ta parti di esey,” segun minister Wever. Awor e siguiente parti di e proyecto di Wilhelminastraat ta bay cuminsa pa embeyece e resto di e area, percura pa tin trottoir mas hancho y mas luz etc.
Asina pocopoco lo bin mas abao pa drecha e parti di Lagoen y henter e area aki tambe segun e mandatario, enfatisando cu e desaroyonan di parti di inversion di gobierno ta sigui. “Nos a haci un compromiso cu e comerciantenan y cu Aruba, anto nos ta cumpli cu esey.”
Lamentablemente e fondonan no ta asina hopi manera ta desea pa asina haci un impacto mas grandi, dus ta bay den fase segun minister Wever. Cu e desaroyo di Wilhelminastraat no ta yega den Caya Betico Croes, esey ta algo cu comerciante Tieleman ta bisa – “y mi ta tum’e pa berdad, mi ta kere esey ta un otro categoria.” E mandatario ta subraya cu e desaroyonan na Wilhelminastraat ta enfoca mas riba parti di gastronomia y restaurant, cual ta sinti cu si ta haya bon acogida. E parti di Caya ainda no tin tanto enfoke den e parti di horeca pero gobierno kier bin cu un Algemeen Precarie Beleid caminda por tin mas terasa pafo mas facil.
Minister Wever: “Tin trabaonan sosodiendo, nos a caba di finalisa e proyecto di 100 palo di luz extra pa trece ful iluminacion den henter caya grandi pa asina tin mas claridad, y purba reduci criminalidad y molester di adictonan ambulante. Pa por tin mas luz caba ta un di e prioridadnan den luga pa por sigui desaroya nos caya principal.”
