Pa algun tempo caba esnan cu ta pasa den caya ta mira un casita di carton den bisindario di centro di Oranjestad. Y e tin un habitante fiho.
Ta trata aki di Genesis Hart cu ta un adicto ambulante, kende a dicidi di traha esaki den un cas di coriente. E ta un mahos bista pa motibo cu turistanan ta pasa den e area ey tambe. Mas pariba, den e hanchi pariba di ex La Linda, tambe tin un adicto ambulante cu ta drumi den un di e cashinan di coriente.
Esun banda ex Adidas tin basta tempo bibando eynan. Ya caba Polis a yega di orden’e pa bay for di e sitio y ora cu e no a haci caso, nan a mes a “ruim op de boel”. Sinembargo pa sorpresa di tur hende, cu a yega di bati alarma pa e bista mahos, un biaha mas el a bolbe cu tur su potoshinan. Ta trata di un adicto ambulante di casi 30 aña.
Den combersacion cun’e por a nota cu e tin un frustracion hopi grandi y tabata papia di un forma hopi agresivo. E kier duna of bisa loke e ta pensa solamente si tur autoridadnan concerni t’ey presenta.
Mester bisa cu e ta un bista hopi tristo y e video ta papia pa su mes.
