Na 1967 Victory Outreach a keda funda na Los Angeles pa Sonny Arguinzoni y e tabata un ex adicto di heroina, kende a cuminsa cu e iglesia. Y pa 52 aña largo ta haciendo e trabao. Jerry Mendeszoon ta pastoor di Victory Outreach Rotterdam y e ta sigui cu su trabao.
Segun Mendeszoon, e necesidad na Aruba ta enorme y e ta mirando bek kico Victory Outreach por haci y traha hunto cu otro misa. Kisas e ayudo aki por ta den forma di trabou di rehab, cu e tin experiencia den dje. “Nos kier yuda unda cu por,” el a bisa.
Experiencia na Aruba
Aruba tin un necesidad grandi, segun Mendeszoon. Diesdos aña pasa el a papia cu algun hende riba loke ta e necesidadnan riba e isla. Pa loke el a experiencia, poco a wordo haci. No solamente e necesidad ta grandi, pero e ta birando pio. Mendeszoon a comenta cu tin varios Arubiano cu ta bin Rotterdam y ta manda nan bek. Victory Outreach Rotterdam tabata tin su frutonan y tin hendenan, cu ta na Aruba, cu por duna testimonio di esaki.
Mendeszoon ta mirando y ta buscando pa papia cu Secular Rehab, con pa gara e toro na su cacho. No ta trata di iglesia, no ta trata di dje, no ta traha di secular, sino ta trata di hendenan cu mester di e ayudo necesario. Ta famianan cu ta kibra pa e motibo aki. Tin un generacion nobo ta biniendo y cu no a haya un bon ehempel.
Solucion
El a splica cu falta algo den henter e proceso di ayudo cu ta wordo brinda y ta kere cu por contribui den esaki. E fruto di e trabou haci pa Secular Rehab ta practicamente nulo, y ta haya cu mester pone aserca e ayudo di psychiater, psicologo y mester di e ayudo Celestial. “Mester ta honesto. Droga ta puiro. Bo por supl’e, pero tras di e puiro tin un poder cu tin hende den nan gara y e poder ey bo no por bringa cu remedi, cu spuit of cu pildo. E poder ey por kibra den nomber di Hesus. Esey ta tur.” Esey ta loke cu Mendeszoon a bisa cu e ta para p’e.
Aruba compara cu Hulanda
E situacion na Aruba ta hopi mas pio cu Hulanda. Tin hopi Arubiano ta wordo manda na VO na Rotterdam. Tur cos a purba cu nan y na final nan propio famia ta manda nan. Algun di nan ta bolbe Aruba, pero otronan no kier bolbe mas.
Casonan exitoso
Tin basta persona cu a bin di Aruba na VO na Rotterdam y por mira e fruto ora cu nan a bin bek. VO International ta cla, segun Mendeszoon. E tin cu reporta ora cu e bay bek Hulanda. Y despues e lo tin cu bay Mexico pa nan bay sinta brainstorm. Pa Mendeszoon mes esaki ta prome biaha despues di 12 aña y e mester di tempo pa traha cu rehabs. E kier drenta y yuda nan. Establece liderazgo. Pa e grupo di meta aki, tin un manera pa traha cu nan.
Mendeszoon mes ta un ex junkie, cu a cuminsa cu luxe junk y a caba na nada. E tabata coba den bari di sushi, tabatin plannan di suicidio y no kier a biba sin e droga. El a resa y eynan el a haya forsa pa busca ayudo, pasobra e no tabata tin ningun hende mas. E no tabata tin mama, e no tabata tin amiga, su rumannan tampoco. E mes mester a haci tur cos. El a siña para pa su escogencia y a haci esey riba su mes.
Victory Outreach ta yuda hopi hende, pero e ta pensa cu esey so no ta e solucion. Aki na Aruba mester haya un rehab solido pa asina no mester manda hende afo. Ta p’esey Mendeszoon a bin bek. Si por uni forsa, shelo ta solamente e limite y stop di bringa otro, pasobra tur mester di otro. Respeta otro, cada ken den su propio forsa.
