Siman pasa, varios fundacion a bini hunto pa papia con lo bay enfrenta e temporada di alerta y cuarentena aki y cu su consecuancianan. Fundacionan e.o Club Kibrahacha, Fundacion Movemiento ta Bida, OPPA, Koningin Wilhelmina Kankerfonds, Fundacion Diabetes, Wit Gele Kruis, Heart Centered Leadership Foundation, Centro Quivit y Fundacion pa nos Comunidad a uni.
E reunion tabata un iniciativa di CEDE Aruba. A papia tocante diferente necesidad di gruponan vulnerable durante e situacion di COVID-19. E organisacionnan a uni forsa pa cuminsa cu un servicio nobo pa nos grandinan: un linea di telefon gratis.
E Ultimo desaroyonan pa cu e Coronavirus a hasi cu mester a stop tur actividad social pa nos grandinan. Esaki tin un impacto pa nos grandinan cu awor ta wordo limita pa socialisa cu otro. P’esey e grupo di fundacion ta introduci un linea di telefoon gratis na unda nos grandinan por yama. Nos grandinan por yama pa un conversacion, pero sigur tambe pa tur pregunta of informacion. Club Kibrahacha ta encarga pa coordina e projecto aki.
E linea di telefoon ta: 280-0505 Por jama e linea di contacto pa nos grandinan durante dia for di 8or di mainta pa 12or di merdia y atardi for di 4or pa 8or di anochi. E linea ta completamente gratis. Nos mensahe pa nos grandinan ta: ‘BO NO TA BO SO, NOS TEY PA SCUCHABO’.
Cu e linea di telefoon aki a crea oportunidad pa sucha y combersa cu nos grandinan. Asina tambe nos ta keda den contacto cu nan y alavez haya sa kiko ta biba serca nan den e situacion actual. E fundacionnan kier evita cu nos grandinan ta keda isola. E linea di telefoon ta wordo maneha pa un grupo di boluntario di diferente fundacion. Diasabra ultimo a cuminsa cu 15 boluntario cu ta atende e jamadanan. Dentro di poco nos ta bay amplia e grupo aki pa asina nos por atende tur yamada cu nos ta ricibi. Si tin hende den comunidad cu kier yuda cu esaki, por tuma contacto directo cu Club Kibrahacha na Tel: 582-8159. Tambe por registra como boluntario ariba e website ORG.AW.
