Durante e di dos anochi di toque de queda un periodista tambe tabata parti di e mas di 40 detencion cu a tuma lugar. E periodista tabata trahando riba un noticia na Palm Beach y tabata na caminda pa Santa Cruz ora cu polis a par’e.
Na e momento aki e periodista a duna polis e carta di su dunador di trabou pa confirma cu e ta trahando. Polis no a tuma esaki y a dicidi di detene. E carta ta confirma cu e ta un periodista y trabou di periodismo ta sigui 24ora pa dia. Esaki ta nifica mescos cu tin excepcion pa companianan di siguridad, limpiesa y otronan e tambe tin cu eherce cu trabou.
A transporta e periodista pa warda di polis. Na warda di polis e periodista a ricibi un multa di 1000 florin. Combersando cu e periodista el a confirma cu e no lo bay paga e boet y cu e lo laga e caso bini dilanti corte. Henriquez ta coresponsal international di Caribisch Netwerk.
