Diasabra Fundacion Pa Nos Muchanan a haci un repiticion di e workshop ‘Comunicacion den centro di cuido di mucha’. Lidernan y e cabesantenan di diferente Centro di Mucha a participa na e workshop aki.
Bon comunicacion ta forma e base den tur relacion entre hende, pa e motibo aki, durante e workshop cursistanan a haya diferente informacion cu ta regarda comunicacion entre colega, comunicacion cu mayornan y e muchanan. Tambe a fiha riba e lider/cabesante mes como persona y e influencia cu e forma cu ela a wordo lanta como mucha tin riba su forma di comunica como adulto.
E parti aki tabata un “eye opener” pa e cursistanan y alabes nan a ricibi tools con pa mehora e forma di comunica. Na final di e workshop, a haci un “rollenspel” unda cursistanan mester a actua den diferente scenarionan di situacionnan real cu sa sosode den nan trabou. Durante e parti aki e cursista a practica e metodonan cu el a siña durante e curso pa resolve un situacion.
FPNM ta gradici drs. Swinda Dumfries, Orthopedagoog di Jeugdgezondheidszorg cu a fungi como orador durante e workshop den cual el a comparti diferente informacion y “tools” cual nan por usa den nan trabou diario cu mucha y alabes pa nan mes como persona.
FPNM ta felicita tur cabesante y lider cu a participa y kier a corda cada participante cu ‘abo tin e forsa y e control pa comunica y reacciona otro’. Pa mas informacion tocante nos cursonan por tuma contacto cu nos na 588-0586/583-4247 of bishita nos Facebook page.
