Manera cu gobierno di Hulanda a priminti, dia 13 di januari e freezernan ta yega Aruba. Y esey a sosode.
Informacion cu 24ora.com a ricibi ta cu e freezernan ta na Aruba caba y warda. Ta spera cu pa diabierna awo lo por saca nan y haci e transporte pa e area unda nan lo keda y poni na temperatura pa ricibi e vacunanan.
Minister di salubridad publico den su prome conferencia di aña a informa di yegada di e freezernan, no a menciona cuanto, cu lo yega dia 13 di januari. Unabes cu instala esakinan, ta spera yegada di un delegacion di Hulanda (funcionarionan di RIVM) pa controla e freezernan, e proceduranan y e personal entrena.
Despues di esey e prome cargamento di vacunanan lo yega pa cuminsa e programa di vacunacion pa memey di februari.
Hulanda te aworaki tin unicamente e vacuna di Pfizer, cual lo ta esun cu Aruba tambe lo haya, pero e cantidad no ta conoci.
