Net prome cu e fecha di dos siman pa partidonan dicidi si nan ta apela e sentencianan den caso IBIS, Ministerio Publico a informa Corte cu nan lo apela e decisionnan. IBIS ta e caso di soborno di un Minister cu su investigacion a dura casi dos aña, costando mas cu 2 miyon florin y cu a produci 23 acusado hiba dilanti mesa berde.
Despues di e sentencia di dia 22 di februari ultimo, hopi a pensa cu entre otro ex Minister Paul Croes y esunnan condena na castigo di prizon sigur lo apela e decision. Inclusive a pensa kisas Ministerio Publico lo no apela e caso mirando cu ta 5 vrijspraak a wordo duna den e caso aki, considera uno grandi y e prome di su indole na Aruba.
Pero diabierna ultimo Fiscal di Ministerio Poblico a informa Corte cu nan ta apela tur 23 decision den caso IBIS, relaciona cu investigacion di soborno di ex Minister Paul Croes, sospecha di a otorga un cantidad grandi di ontheffing (dispensacion) di evaluacion di e mercado laboral a cambio di pago di sumanan grandi cu despues, segun Husticia, e ex mandatario a laba.
Tambe a acusa pareha di Croes di a uza servicionan di un señora kende no tabatin permiso pa traha na Aruba y cu a yega Aruba como turista y cu e mandatario a convence funcionarionan pa lague pasa sin su carta di garantia.
Banda di e Minister tabatin 22 otro persona, sea tramitado, intermediario, comerciante of ex empleadonan di e Minister, cu tambe ta acusa di a participa den soborno.
Di e total di 23 acusadonan solamente e Minister y dos tramitado a haya castigo di prizon for di Corte. Esta Felipe Schwengle y Juanchito Filiciana. Un grupo di comerciante a haya boet, 5 a haya vrijspraak y e restonan a haya castigo combina of trabou pa comunidad.
Tur cos ta indica cu den e ultimo kwartaal di 2019 Hof, representa pa tres Hues, lo bay kibra cabes un biaha mas riba e caso aki.
Mester agrega cu ex Minister Paul Croes, su casa y algun acusado mas tambe a apela e sentencia ricibi den Corte di Prome Instancia.
