Diabierna mainta Corte a trata e caso penal contra un grupo di 8 persona, 3 Arubiano y 5 Venezolano, kendenan tabata envolvi den dos caso grandi di atraco. E prome a tuma luga riba e joyeria Gems, dia 30 di November y e otro dia 7 di januari na La Estrella.
Ministerio Publico ta considera cu esaki tabata un plan bon traha, unda cu a busca persona(nan) for di Venezuela pa ehecuta e dos asaltonan arma riba e joyerianan. Delitonan cu a causa hopi shock den e comunidad di Aruba pa e violencia cu a bay compaña cu esaki, uzando armanan di candela.
Pa e hombernan Eduardo M.G. y e Arubiano Osberth F. (kende den pasado a wordo condena pa csonan di kiebro) a pidi 9 aña incondicional, considerando nan e cerebro den e dos atraconan aki. Pa Omar CT, kende ta un di e atracadornan cu a drenta e negoshi cu arma den man, a pidi 5 aña y mey. Pa e Arubiano Billy B., kende ta wordo considera planeado di un di e atraconan, a pidi un castigo di 5 aña; Pa Eduar JCA a pidi 4 aña; pa e señora Mildred EMB, kende a sconde arma y droga, a pidi 24 luna di cual 8 luna ta condicional y 2 aña di Prueba (e ta den libertad awor); pa Herman JDB a busca e armanan a pidi 2 aña; y Rafael RRV, kende tabata den presencia di armanan di candela (ora e grupo a wordo deteni) a pidi 18 luna, kitando e tempo cu el a keda deteni (e ta den libertad awor).
Aki tres siman tin sentencia den e caso aki.
