Un dicho na Hulandes ta bisa “de kogel is door de kerk!” E fin di siman ultimo, kerki a keda yen di buraco ya cu ta varios “kogel” mester a pasa door di dje. E play-off dje torneo anual di FEBIAR di bola 8 tabata sufri pisa di ‘global warming.’
Diahuebs, dia 10 di november, Steelers BT a enfrenta Mongoose BT, caminda Steelers a sali “ijzersterk” y a masacra e Mogoosenan cu score aplastante di 5-1. Riba e mes un anochi, na otro mesa, e gang feroz di cacho brabo di Pos Abou y vecindario, esta Mad Dogs BT, a causa un drama cerca e team legendario di añanan 70 bin ariba, nada menos cu Barracuda BT. Mad Dogs BT a gana cu score di 5-3. E score a keda despues di dje prome anochi di wega: Steelers 1 – Mongoose 0, y Mad Dogs 1 – Barracuda 0.
E di dos anochi di wega, diabierna 11 di november, e Mongoosenan a bin mal razo contra Steelers, pero asina mes Steelers a sa di cambia speed bay pa “een tandje hoger” y a sa di duna Mongoose nan “elfde van de elfde” cu score nip-nip di 5-4. N’e otro mesa, Barracuda a debolbe e cachonan brabo un “koekje van eigen deeg” cu score di 5-3, pa asina empata e play-off. Steelers BT pues ta den final ganando nan play-off cu score di 2-0, mientras cu tur hende cu sa kico ta come y bebe den biyar tabata wanta nan curason pa locual tabata pasa diasabra anochi den e desenlace entre Barracuda y Mad Dogs.
Diasabra anochi e bataya a habri desastroso pa Barracuda, ora cu Allan van Aanholt a gana D’Angelo Odor, y George Nobrega a gana nada menos cu “ojo de aguila” Ransley Tromp. Mad Dogs a bay ariba cu 2-0, pero Barracuda tabata down, but not yet beaten. Jorzinho Everon ta baha tire di Richard Gomes flat-flat, y mes ora despues Johnny Bravo a gana nada menos cu Ryan Rampersaud pa dje manera aki tabla e bataya na 2-2. Dos otro cacho di rasa, Johnny “Indiaanse Herder” Tromp y Maikel Maduro a balota Andre Tromp y Win Dabian. Barracuda a gana e tag-team pa bay ariba cu score di 3-2. Tension a bay den overdrive ora Armand Ridderstap di Mad Dogs a gana “The King of Mal Ehempel” Pedro La Rosa y e bataya ta empata na 3-3. Mad Dogs tabata den “feeding frenzy” ora cu e teribel Angelo “Machete” Tromp a piki un victoria importantisimo contra legendario Ditto “D’Gun” Acosta, y pone Mad Dogs “on top of the hill” cu score di 4-3. Jason “Friday the 13th” Kock a pone liña pega den baranca yta duna Barracuda speransa door di gana Beto Saladin di Mad Dogs. E bataya a empata na 4-40 Finalmente, nada menos cu e legendario Richard Wolff di Barracuda a domina e pitbull di Mad Dogs, Mitchel Kelly, pa asina logra pasa pa e gran final cu score di 5-4.
Shonnan, prepara, pasobra e ‘crème de la crème’ den biyar di aña 2022 lo bay enfrenta otro den e gran final cuminsando diahuebs awor 17 di november, continuando pa diabierna 18 di november, y si ainda mester, pa diasabra 19 di november binidero. Manera semper, entrada ta completamente gratis y FEBIAR kier a invita ful pueblo di Aruba pa presencia e gran final entre Steelers BT y Barracuda BT.
