Luna di maart ta cerca y Comision Celebracion Dianan Nacional (CCDN) bou auspicio di Ministerio di Cultura hunto cu Comision Promove Cultura y Fundacion Cultural di Festival Folklorico ta trahando riba e ‘Festival Un Canto na Aruba su Himno y Bandera’.
Festivalnan cu cada aña ta crece y ta crea composicionnan di calidad presenta cu briyo y talento door di e cantantenan. Nos adultonan cu ta participa den e festival di adulto tambe ta duna nan tremendo aporte na e festivalnan y nos luna cultural.
Compositornan ya ta kibrando cabes pa bini cu e miho composicion. Esaki mirando cu aña tras aña nos ta haya tremendo cancionnan. Sin laga afo e musico y areglistanan cu ta duna di nan parti e maximo esfuerzo pa enrilkece nos ritmo.
E aña aki lo tin un solo biaha pa inscripcion y trekmento di lot di ambos festival. Esaki lo tuma luga riba diasabra 16 di februari 2019 entre 6’or pa 8’or di anochi y lo trek lot pa 08:30 pm na Sandra’s Garden riba Plaza Turismo riba Linear Park.
Festival den categoria pre-infantil y infantil lo tuma luga riba 8 di maart 2019. Esun di pre-hubenil y hubenil lo tuma luga riba 9 di maart 2019. Y Festival di Adulto lo tuma luga riba 10 di maart 2019. E tremendo festivalnan aki lo tuma luga riba Plaza Libertador Gilberto F. Betico Croes riba Vondellaan. E orario di festivalnan lo ser anuncia despues dependiendo di e cantidad di inscripcion cu lo ricibi. Ministerio di Cultura, Departamento di Cultura Aruba, Comision Celebracion Dianan Nacional, Fundacion Cultural di Festival Folklorico y Comision Promove Cultura ta invita nos cantante, compositor, lidernan di agrupacion di musica folklorico y interesadonan pa e anochi di inscripcion na Sandra’s Garden. Hunto nan ta spera cu e aña aki henter e pueblo di Aruba tanto hende grandi y chikito bin apoya nos mucha, hobennan, adulto y bo cantante den e gran festivalnan di ‘Un Canto na Nos Himno y Bandera’.
