Fundacion Anti Droga Aruba (FADA), hunto cu Fundacion Zinnia, ta cla pa lansa un otro video pa loke ta nan campaña di Amigo Didi. Un campaña cu ya tin algun aña caba cu ta trahando hopi duro pa conscientisa comunidad di Aruba tocante e parti di uzo di alcohol, na momento cu ta bay maneha un vehiculo.
Na december ultimo a lansa un video hopi grandi pa loke ta Amigo Didi, cu kier a conscientisa e parti aki un tiki riba loke ta brommer, pasobra nan tambe ta hunga un rol den trafico ora di sali bay trip, fiesta.
Tin e parti di alcohol cu ta hunga un rol. E aña aki un biaha mas, pa loke ta temporada di Carnaval, Amigo Didi a bin cu un video diferente.
E biaha aki ta enfoca un tiki mas riba e escogencia cu abo como automobilista ta bay tin, na momento cu sea bo ta den parada, bo ta forma parti di e carnaval, of bo ta bay pa mira parada hunto cu bo famia of amistadnan.
E video aki ta un tiki mas riba e parti di escogencia. Naturalmente tin un team hopi grandi cu tabata tras di FADA un biaha mas pa loke ta e video di Amigo Didi.
Sin lubida tin Cuerpo Policial cu tambe ta forma parti en grandi pa loke ta e campaña di Amigo Didi.
Di parti di Cuerpo Policial, vocero Liliana Rasmijn a splica cu a sinta na mesa hunto cu FADA y Fundacion Zinnia y duna tipnan cu ta mas realistico posibel pa hendenan sa kico ta loke por pasa despues di carnaval.
E video a keda cla hopi tempran, cual ta un bon trabao di esnan encarga cu e grabacion. Di parti di Cuerpo Policial, esaki ta un conscientisacion di loke por pasa despues di carnaval.
Polis tin su unidadnan cu ta controla. Loke a wordo controla durante fakkel, a detene 7 chauffeur cu tabata core auto bao di influencia.
Asina mes cu nan ta campaña cada biaha, toch pueblo no ta tende. Despues di parada di blaas, e controlnan a tuma luga un biaha mas, unda cu 6 chauffeur a keda deteni pa loke ta core auto bao di influencia.
Ta haci tur lo posibel pa loke ta siguridad pa trafico riba caminda. Ta trece den tur diferente manera y awor aki ta keda na pueblo pa corda cu den temporada di carnaval, e controlnan ta tuma luga prome, durante y despues.
Principalmente despues di paradanan lo haya esnan di unidad motorisa para banda di caminda, pa haci controlnan, pa cual ta miho haci uzo di bo Amigo Didi.
Polis no ta kitabo di bebe. Esey ta hopi importante. Pero loke ta prohibi ta bay tras di stuur. No ta bo bida so lo ta na peliger, sino e otronan cu ta uza e careteranan.
Mescos cu bo kier yega bo cas bon, otronan tambe y famianan kier yega cas sano y salvo. Di parti di Cuerpo Policial ta gradici FADA y Fundacion Zinnia, p’asina duna nan e oportunidad pa por a duna un tiki di nan parti tambe.
Goza di carnaval, pero goz’e conscientemente, Liliana Rasmijn a bisa por ultimo.
