F*#% YEAHHH Project: un iniciativa di WOW Aruba

1601

WOW Aruba, un non-profit organization, di hendenan muher hoben adulto cu ta pasiona pa “empower” otro hende muhe, pero tambe nos hobenan, a lanza un projecto unico cu ta carga e nomber di “F*#% YEAHHH”. E meta di proyecto aki ta pa promove uso di proteccion bou hobenan ora ta trata di sex.

E iniciativa aki ta un resultado di un proyecto den 2019 cu a enfoca riba embaraso y maternidad hubenil. Asina e plan a bin pa sigui pone enfasis riba “safe sex” bou nos hobenan, en especial den e temporada di Carnaval. E “F*#% Yeah Project” ta un campaña riba su mes cu ta pone enfasis riba tene relacion intimo na un manera sano.

E manera cu WOW kier trese esaki dilanti ta pa papia na un manera hopi real y espontaneo cual e idea tras di esaki ta pa kibra e taboo cu ta biba den nos comunidad referente sex. WOW ta consiente cu e manera di comunica aki lo por ta controversial pero esaki ta exactamente loke ta desea di wak pa asina nos tur  cuminsa papia di e tópico aki y di e forma aki bira consciente di e tópico di embarazo hubenil y e maneranan cu ta existi pa preveni esaki.

Esaki ta un proyecto cu WOW Aruba su miembronan ta pasiona cu’ne, tambe mirando cu embaraso hubenil ta un reto pa desaroyo profesional di nos hoben nan. Reconociendo e importancia di esaki a pensa cu por contribui na e obhetivo cu varios stakeholders local tin riba e tereno aki, y haciendo esaki como un trabou boluntario y usando metodonan diferente.

Durante 2019 estadistica ta indica cu Aruba su porcentahe di embarasonan “no planea” entre nos hobenan a baha, ilustrando asina e trabou excelente cu ta wordo ehecuta pa e stakeholders tradicional.  WOW Aruba su obhetivo principal ta pa crea mas conscientizacion di e trabou cu instancianan local ta haci riba e tereno aki, pues pa hobenan ta consciente cu tin un caminda pa cana, pero tambe pa trece esaki dilanti den un otro estilo pa asina cubri otro gruponan di hoben caminda cu quizas mensahe tradicional no ta yega. E enfoce ta na prevencion di embarazo como tambe e importancia di e uso di proteccion pa evita malesanan cu por wordo transmiti durante contacto intimo/fisico. E projecto aki lo wordo lanza por medio di un campaña riba medionan social cuminsando 10 di februari y ta conta cu e support di Durex (FRASA Aruba), Urgent Care Aruba,  Audrey Croes y Josh Ras di JDB Digital y Michael-A Fowler. Un “shoutout” ta bai na nos influencers Wichi cu Ty, Karol Croes y Mirzah Manga cu a forma parti di e projecto aki.