Ta organisa quiz di Papiamento

603

Tur aña dia 21 di februari Aruba y henter mundo ta celebra Dia di Idioma Materno. Ta trata di sun dia pa enfatisa balor y importancia di tur idioma materno. 

Relaciona cu e celebracion aki Fundacion Lanta Papiamento ta organisa pa pueblo di Aruba un siman di quiz, titula QUIZ PAPIAMENTO. Durante 4 dia, di dialuna 17 di februari te diahuebs 20 di februari, tur hende por conecta entre 2 or pm y 8 or di anochi cu e programa di quiz y contesta cada dia 10 pregunta.

E quiz ta consisti di pregunta y opcion pa scoge entre 4 contesta esun cu ta bon. Lo trata tema di Papiamento, carnaval, historia y hopi mas. Tur hende por participa na QUIZ PAPIAMENTO. 

E link lo ta activo di 2 or pm te cu 8 or pm:  https://tinyurl.com/vlvarrr. Den e pagina di Fundacion Lanta Papiamento por drenta e link.

Diabierna 21 di februari, cu ta Dia di Idioma Materno, Fundacion Lanta Papiamento ta invita pueblo pa sintonisa e programa di Lyonel Dirksz na radio FM 88.9 Bo Guia. Durante e programa lo duna relato di con e siman di quiz a bay (pueblo tambe por duna opinion). Lo tin un premio atractivo, pa tur edad  pa e miho score.

Durante e programacion di Lyonel Dirksz pa 11.00 di mainta na Bo Guia FM 88.9 lo rifa ademas diferente premio entre participantenan como aprecio pa nan participacion.  Pueblo henter ta invita pa participa na e quiz Papiamento pa 4 dia largo!