“Pasa shete ora na Landsrecherche cu bo abogado no ta un bebement’i koffie; esey ta obviamente un interogacion di un sospechoso,” asina lider di MEP, Evelyn Wever-Croes ta wak e presencia di su contrincante politico, Marisol Lopez-Tromp recientemente na e sede di e departamento hudicial.
Segun e politico y actual mandatario di e pais, Lopez-Tromp ta “otro mas cu su dianan ta conta.” Ora cu pueblo realisa cu bo ta político cu ta gana voto a base di manipulacion, bo sa cu bo no tin mucho tempo mas den politica y bo ta haya tipo di anshanan aki, Wever-Croes a splica.
Fuera di esey, y como líder di MEP, e ta considera cu nan ta un partido cu semper a para pa integridad. Ta kere cu en berdad corupcion ta algo cu por pasa na cualkier caminda, pero e importante ta con bo ta reacciona ora un hende di bo ta hay’e den problema di corupcion.
“Na momento cu bo bras’e y bo ta tapa y sconde corupcion, bo tin un problema,” y a compara cu si “na momento cu bo bisa cu cada ken cu comete algo, ta sinta riba su blaar y carga su responsabilidad. Eynan bo ta wak e diferencia” y ta argumenta cu esey ta hustamente e diferencia di MEP y di AVP; un diferencia cu ta conta pa partido MAS tambe.
