Evelyn Wever-Croes: solucion pa problema cu cuido di salud

110

Den conferencia di prensa di MEP semanal, lider di MEP Evelyn Wever- Croes a elabora riba e solucionnan di MEP pa cu cuido di salud. “Nos salud a wordo neglisha, tempo di espera pa specalista of pa operacion ta demasiado largo, falta personal den enfermeria, y biba saludable casi ta impagable. Nos mester duna salud prioridad bek. Un pueblo sin salud, no tin nada.

Con nos di MEP lo mehora e cuido di salud? CORTA TEMPO DI ESPERA  Pa mehora e cuido di salud mester corta tempo di espera. Pa corta e tempo cu un pacient mester warda pa mira specialista mester amplia e cantidad di specialista. Y si mester nos lo trese dokternan di exterior pa un temporada cortico, pa yuda nos propio profesionalnan wak e pacientnan. Una bes nan keda cla, nan lo bai bek y nos propio specialistanan lo sigi atende cu e pacientnan den un tempo relativamente cortico. Naturlamente nos mester trese nos hobennan  graduadonan den medicina den region bek pa traha na Aruba. Pero no esey so. Mester amplia e orario di sala di operacion. Si tin suficiente personal y tin suficiente material pa hasi operacion, no mester warda tanto. Mescos ta conta pa e orario di hasi test manera scan, MRI, etc. Pa logra esaki nos mester inverti mas den nos empleadonan y nan condicionnan laboral, pa hasi e trabou mas atractivo pa nos hobennan.

Nos mester percura pa e estudio na EPI ta cualifica pa studiantenan por drenta y traha na Hospital mesora sin problema. Percura pa nos tin suficiente enfermeronan. TRESE E CUIDO MAS SERCA DI E PASHENT Awor ta un caminda di crus un pashent mester cana pa yega na cuido. Pa port rese e cuido mas serca di e pashent, pa cuminsa Imsan mester bira un hospital cu tur servicio, pa asina ora un persona cu ta biba pariba di brug bira malo, e por haya tur servicio medico mas liher.E di dos paso ta pa construi un centro medico den e area central di Paradera/Santa Cruz. Y ohala cu un dia tur districto por haya un centro medico of centro di prome auxilio, pero nos mester ta realistico cu e situacion financiero di Aruba no ta permiti tur esaki. PREVENCION Pa mehora e cuido riba termino largo nos mester enfoca mas riba prevencion. Importante ta pa hendenan biba saludable, pero esey ta casi impagable na Aruba. Pesey nos mester baha e prijs riba productonan saludable y educa nos cuidadanonan con pa biba un bida saludable. MEP lo introdusi un chequeo obligatorio cada aña, pasobra asina bo por detecta problemanan den salud di trempan. Un riñon prome cu perde hopi di su funcionalidad, un bista prome cu  laucoma bai cune, Cancer prome cu e bira mas grandi. Den tur e casonan aki e tratamento ta mucho mas efectivo y menos costoso si e malesa wordo detecta na tempo.

Cu salud di hende bo no ta hasi wega. Nos dokternan y profesionalnan ta hasiendo nan maximo esfuerso pa mantene e cuido na un nivel halto, pero nan mannan ta mara. MEP ta di opnion cu unpueblo salud y un pueblo educa por enfrenta tur retonan, y pesey cuido di salud lo haya prioridad. Nos lo cambia e enfoke di gobernacion cu awor ta riba estetica y embeyesemento, y pone e enfoke riba e ser humano, pasobra pa un pais progesa e ser humano mester ta salud pa e por progresa tambe.