E siman aki Minister Presidente Evelyn Wever-Croes a presenta su maneho pa 2018. Como e
mandatario encarga cu asuntonan general, como tambe cu energia, integridad y innovacion, el a splica e retonan cu tin pa 2018 y e metanan principal: un aparato gubernamental eficiente y integro; energia accesible pa tur hende; innovacion pa prepara nos pais pa economianan nobo. Mes momento e prome minister a mustra cu e situacion financiero dificil, ta pone cu e ta duna ehempel y ta cuminsa na su mesun ministerio.
Pa di prome, Minister President actual a mustra con e por haci e mesun trabou cu e ex Prome Minister, y hasta miho, cu menos hende. Su presupuesto ta basa riba un rebaho di mas di 100 persona, pa un total di 8 miyon florin. Pa di dos a corta den e gastonan di propaganda y promocion, emostrando cu e como Prome Minister no ta bay paga un compania di mercadeo pa haci propaganda, pero a corta cu 800 mil florin, pa asina inverti den BUVO, e departamento di Gobierno cu mester haci e trabou di informacion. Pa di tres a kibra contract di lease di 3 pick up cu sticker di AVP, cu e no tabata tin mester.
Finalmente ainda ta den lucha pa kibra contract di huur di edificio cu e no tin mester, pero cu e ex Prome Minister a mara e Gobierno aki cu no por termina. Asina mes Prome Minister Evelyn Wever-Croes a laga sa cu e si lo termina e contract y asina por aloca 100 mil florin mas na esnan mas den necesidad den nos comunidad. Cu esaki e mandatario ta mustra cu e a bisa loke e ta bay haci, y a haci loke el a bisa. Cuminsa cerca bo mes! Esey ta su mensahe!
