Dialuna ultimo e estudio di ‘Basis Opleiding Kustwacht’ (BOK) pa 2021 a start. BOK ta un estudio cu ta dura 1 aña consistiendo di vaknan practico y teoretico, incluso e estudio di ‘Buitengewone Agent van de Politie’ (BAVPOL). E aña aki Wardacosta su estudio di BOK a cuminsa cu 22 hoben di Aruba, Corsow y St. Maarten. Tur tin e ambicion pa bira un agente di Wardacosta pa asina yuda proteha nan pais.
For di dialuna e aspirantenan di BOK a cuminsa na e periodo di introduccion, e asina yama ‘SamenSterk periode’ den cual nan lo ser reta mentalmente y fisicamente. E estudio ta start cu e parti pa sera conosi cu e instructornan di BOK y un test pa midi e hobennan fisicamente. Abase di e test fisico aki e instructor lo traha un programa di entrenamentu pa e aspirante. E meta di e periodo di ‘SamenSterk’ ta pa e aspirante crese mentalmente y físicamente y cera conosi cu e organisacion di Wardacosta. For di e aña aki e estudio lo tuma luga na e base militar na Suffisant na Corsow cual tin un campamento special pa entrenamentu di hobennan. Wardacosta ta desea tur 22 hoben exito den e aña binidero.
