Salvase quien pueda. Nos minister presidente a anuncia cu campaña a start y cu partido MEP ta stabiel. Dicon anto e matrosnan a cuminsa bula for di e barco di libertad? Probablemente pa scapa nan pellejo despues di a scucha lider di MEP expresa cu a cuminsa busca cara nobo pa subi lista. E miembronan di partido MEP a expresa caba cu nan lo no regresa riba lista di partido MEP y nos por a compronde di medionan di comunicacion cu algun parlamentario di MEP kier bira director di cierto departamento di gobierno.
Mas cu logico cu nan sa cu partido MEP lo no forma parti di e proximo gobierno y e ora nan chens pa bira parlamentario lo bira chikito, pasobra esunnan cu ta minister awe mester haya nan luga den parlamento. Partido Raiz cu no kier realisa cu campaña a cuminsa y nan ta manera e grupo cu tabata toca riba Titanic e cantica “mas cerca bo”, mientras e barco tabata sink.
Mas medida ta na caminda cu aumento di prijs di gas cu 30%. Esaki automaticamente nos lo mir’e den prijs di cuminda den e restaurantnan y otro cos. Esunnan cu ta bende cuminda, snack y bolo pa asina nan tin un entrada pa tin un miho nivel di bida lo ta bay tin e mas dificil. Ya caba tin un peso grandi riba nos pueblo pa via di aumento di costo di bida, eigen bijdrage di AZV, prijs di gasolin halto, aumento barbaro di awa y coriente. Ora cuminsa trata e presupuesto 2023 nos lo haya sa ki medida mas gobierno lo kier bin cu ne pa suta pueblo. Pa corona, gobierno ta aumenta BBO cu un 1.5%. Comerciantenan Uni a duna splicacion na placa chikito efecto cu esaki lo trece cu ne.
E problemanan ta sigui acumula sin cu tin un solucion na caminda. Al contrario e problema cu salud mental y problema social ta grandi, no tin placa pa drecha e planta di purificacion na Bubaliplas. Problema financiero den Arubus, Serlimar y Post NV sin papia mes di nos careteranan cu ta den mal estado. Riba dje kier cera cas di nos grandinan Saba.
Gobierno ta carece di un vision y no tin un maneho pa locual cu Aruba mester prepara pa enfrenta. Tur caminda ta papia di scarsedad di alimento cu lo tin mundialmente y aki na Aruba nos gobierno ta sinta man crusa. Dios no laga cu bin un guera na medio oriente pasobra esaki lo haci cu lo bay tin aumento barbaro den prijs di crudo. Na Merca caba tin papia cu pa Thanks Giving (24 di november 2022) tin estado cu lo no tin gasoil of diesel.
Nos tin un gobierno cu a cera tur oido pa pueblo di Aruba y nunca tabata tin e bienestar di nos pueblo na pecho. Un partido cu su plan di gobernacion ta medida. Un gobierno cu ta pusha e metanan di desaroyo sostenibel Agenda 2030. Un agenda diabolico cu ta bay contra tur leynan di Dios. Pueblo di Aruba no tin otro caminda sino di busca Dios paso solamente Dios lo por guia nos den e proceso aki. Si nos kier mira un cambio y progreso den e tempo aki mester busca Dios di curason. A keda demostra y nos ta bib’e tur dia cu un gobierno sin Dios ta un gobierno inhusto. Solamente esunnan cu tin temor di Dios den nan bida lo por trece e cambio riba e isla aki. Ora e husto ta goberna e pueblo ta prospera.
