Nos por corda cu den porta di misa nos prome minister a bisa un mama cu su yiu lo no wordo kita for di trabou. Wel no a dura mucho paso su siguiente siman e director a bay su cas. Si den porta di misa mes ta lansa mentira con nos por pone nos confiansa den un prome minister asina. E mesun prome minister a bay gobernador entrega retiro di su gobierno pa via di Parlamentario Howell.
For di mei 2021 el a haya un e-mail caminda a haci un apelacion na prome minister pa kita e minister plenipotenciario paso e no ta integro. Con un hende asina por papia di integridad si e ta un mentiroso! E palabra di Dios ta bisa laga bo si ta si y bo no ta no. A firma yen di acuerdo pero no ta cumpli cu nan. E gobierno aki a yega na un punto cu ya no ta posibel pa negocia cu ne paso si acuerdonan firma mes e no ta respeta.
Nos di partido Curpa ta sigui kere cu hopi mas acto di corupcion lo sali na claridad. A sconde e rapport di Algemene Reken Kamer, Central Accounten Dienst pa locual cu ta trata e mal maneho di parti di ex- minister di Asuntonan Social. Esun di Arubahuis lo sali cualkier momento na luz di dia. Esaki mester ta señal cla cu trahadonan den nos gobierno y otro caminda lo no sigui tapa malversacion cu ta tuma luga den nos gobierno.
Den periodo cortico cuater minister a sali pa Washtington, Surinam, Ecuador y pa India malgastando placa di pueblo. Nos minister di husticia ta esun cu ta bay mas leu, esta te na otro banda di mundo pa un conferencia di Interpol. Anto e ta bay cu un delegacion cu lo costa pueblo basta placa. Nos por a tende cu e minister di husticia cu tabata polis no por ni regla posicion huridico di polisnan cu mester ricibi nan promocion.
Tin casonan na granel contra di gobierno pa via di un maneho cu gobierno a bin cu n’e for di aña 2018 y cu te aña pasa a wordo manda parlamento. Gobierno a perde tur e casonan aki y tin cu te dia di awe aunke ‘dwangsom’ riba dje gobierno no a honra. Nos ta den un tempo dificil y nos tin gobierno comunista cu ta trapa riba derechonan di ambtenaarnan. Tur cos ta mustra cu esunnan den gobierno kier probecha paso e fiesta ta yegando su fin. “El ultimo biahe de despedida”.
E gobierno mentiroso aki a garantisa cu Respaldo lo haya fondo pa sigui opera, pero awor a sali na cla cu Respaldo ta cera departamento pa via cu no tin fondo. Awor esunnan den Respaldo ta riba caya. Tin hopi keho pa motibo di ‘eigen bijdrage’ ora di busca remedinan cu no ta un poco placa. Punto 3 di metanan di desaroyo sostenibel ta papia di salud y bienestar. Ki bienestar bo kier papia di dje si un parti grandi di adulto mayor tin poco recurso, paso mester biba di un solo pensioen corda pa bay paga pa nan remedi.
Parce cu gobierno su maneho aki kier deshaci di nos grandi nan paso nan ta considera nan un carga. Tur paisnan cu ta pusha e metanan di desaroyo sostenibel agenda 2030 ta hiba mesun tipo di maneho cu 1000% no ta na bienestar di pueblo.
Francia a declara welga general dia 18 di october 2022. Na Spaña, Alemania y Hulanda pueblo ta cansa di un gobierno dictatorial. Imperionan socialista ta bin abao y gobiernonan lo bay cas. Aruba lo no ta un excepcion. Rond mundo paisnan a haya debor di partidonan politico cu ideologia social. Nan no tin nada social sino nan propio beneficio y Aruba no ta keda atras.
No sconde tras di casonan di P. Croes y di Sevinger pa tapa locual cu a pasa den salubridad, den asuntonan social, Arubahuis, Eagle LNG etc. Saca e balki for di boso wowo y mira den boso propio seno. Nos tin un parlamento cu no ta funciona y ta complice den gobierno su maldad. No gaña boso mes, Dios no ta laga boso haci bofon di Dje pasobra locual cu boso sembra, esaki tambe lo boso cosecha. Partido Curpa ta e unico cu ta contra di e metanan di desaroyo sostenibel agenda 2030 cu ta no ta sostene ningun hende sino nan propio un beneficio. Laga nos lucha pa nos libertad.
