Djamars 27 di mart Minister Zita Jesus-Leito a hasi entrega ofisial di yabi pa kasnan di e proyekto Bo Kas na Bo Midí. Ta trata di kasnan pagabel ku ta forma parti di e proyekto Public Private Partnership (PPP), kual ta nifiká ku gobièrnu ta traha huntu ku partnernan privá pa traha bibienda pa nos suidadanonan.
E kasnan aki ta brinda e posibilidat pa ekspandé te na tres kamber i dos baño i ta enfoká riba e tradishon kurasoleño di hopi tempu unda hendenan lokal ta traha riba nan kas ku yudansa di famia, amigu i konosínan. Den presensia di empleadonan di Domeinbeheer, Dusron Development & Construction B.V. i habitantenan di e area di Sapaté, Minister Zita Jesus-Leito a hasi entrega di forma ofisial di e proyekto Bo Kas na Bo Midí.
Dusron Development & Construction B.V. ta e kompania ku tabata enkargá ku konstrukshon di e kasnan i Sr. Lyongo Juliana ta e arkitekto ku a diseñá e kasnan. Komo ku ta trata di proyekto PPP, personanan riba lista di espera di Domeinbeheer ku interes den e kasnan tambe por a bin na remarke pa aplikashon.
Pa fasilitá e kumpradó riba termino largu e proyekto a ofresé e oportunidat pa rèk e kas segun deseo, nesesidat i forsa. Kada kumpradó a risibí e kas ku e fundeshi kompletu, esta ku e fundeshi kla pa ekspanshon, i ku pèrmit nesesario (bouwvergunning) pa sigui ku konstrukshon di e kas segun forsa.
Domeinbeheer ta sigui traha duru riba proyektonan similar di PPP pa fasilitá personanan ku ta den nesesidat di bibienda pagabel i di bon kalidat.
