Un rebelion registra diaranson den algun cel di wardanan policial di e ciudad Venezolano di Valencia, a laga un cantidad indetermina di morto, un ONG cu ta defende derechonan di preso a denuncia.
E incidente a tuma luga parti mainta durante un intento di fuga den e celnan di e stacion di polis den e estado Carabobo. E detenidonan lo a cende colchonnan na candela y a kita arma di un funcionario, e ONG Una Ventana a la Libertad, a informa.
Segun Carlos Nieto, director di e ONG, e rebelion a laga decenas di victima, entre morto y herido. “Algun di nan a muri kima y e otronan pa asfixia,” el a bisa AFP.
Sinembargo, el a aclarea cu “no tabata tin ningun pronunciamento oficial.”
Nieto a afirma cu loke a sosode “no ta un situacion aisla,” ya cu “tur comisaria di polis di Venezuela, ta bibando condicionnan mescos of pio di hacinamento, falta di alimento y enfermedad.”
Un fuente di e Ministerio di Servicionan Penitenciario consulta pa AFP, a sigura cu di no ta na altura di e hechonan, incluyendo cu e cartera aki solamente ta ocupa di monitor e prizonnan nacional.
Mey mey di e confusion, famianan a purba di drenta den e sede policial – cu ta depende di e gobernacion di e estado Carabobo – y durante e forcegeo un funcionario a keda herida cu un piedra. E protesta a wordo dispersa cu bomnan lagrimogeno.
13 dia pasa den un cel riba e isla turistico di Margarita, nort id Venezuela, 58 prizonero a scapa via un buraco cu nan a habri den un muraya.
E prizoneronan – cu a wordo recaptura – a huy atrabes di e buraco di aproximadamente 60×40 centimeter cu nan a habri den un muraya.
E hacinamento den e prizonnan di Venezuela ta obliga cu e cuerponan di siguridad ta uza centronan policial, unda cu e detenidonan no mester pasa mas di 48 ora pa ley, manera luganan di reclusion permanente.
E ONG, cu ta calcula cu e sobrepoblacion den e dependencianan aki ta alcansa un 400%, el a denuncia cu 65 persona (62 prezo, un familiar y un polis) a muri na 2017 den confrontacionnan pa e control di cel y pa motibo di padecimientonan asocia cu desnutricion y tuberculosis.
Na 2011 e gobierno a pone den marcha un plan pa adecua e penalnan na standardnan internacional y caba cu e violencia entre gruponan enemigo, pero e enfrentamentonan ta sigui ta normal.
