Ora Dios duna nos algo, nos mester balora locual, Dios a duna nos y haci tur locual ta den nos forsa pa defende locual Dios a duna nos.
Locual ta pasando awendia, cu e defensa Spiritual di hogarnan ta hopi abao, door cu hende su curason, a hala for di Dios, y e murayanan a scheur, y hopi hende no ta tuma tempo pa cera e scheurnan. Nos ta biba pa biba, mientras cu diabel ta fiesta pa fiesta.
Dios a duna nos famia y Dios a duna nos yiunan, esey ta un bendicion grandi cu un ser humano por ricibi di Dios. Pasobra placa no por reemplasa famia, bo por puntra un hende cu a perde su famia, aunke e ta rico, lo e bisa bo, mi ta entrega tur cos pa mi haya mi famia bek.
Noe tabata un homber di famia.
Job tabata sirbi Dios, y Dios a traha un cura rond di Job y su famia.
Dios a bendiciona Isaac, pasobra Abraham su tata tabata fiel na Dios.
Hopi mayor no ta balora nan bida spiritual como herencia pa nan yiunan, p’esey hopi biaha e mayornan ta laga herencia grandi financiero atras pa nan yiunan. Pero door cu e bida spiritual di e yiunan ta hopi zwak, enemigo ta drenta y horta tur cos for di nan.
Pasobra nan no tin e dedicacion na Dios manera nan mayornan tabatin.
Nos ta bibando den un tempo caminda e enemigo di nos bida, ta mas rabia cu nunca cu tur locual ta famia y yiu. E ta busca tur manera pa perhudica, pa bruha, pa trastorna e palabra di Dios, pa asina corumpi mente di e hobennan pa nan no sirbi Dios. Hasta ley ta wordo cambia pa frustra nos muchanan.
Pero no laga nos lubida locual ta para skirbi den Galationan 1:8+9 Pablo ta bisa: Ma maske nos, of un angel for di cielo lo a predica na boso, un otro evangelio contrario na esun cu nos a predica boso, cu e sea maldiciona.
Manera nos a bisa caba, asina mi ta bolbe bisa awor, si un hende predica na boso un otro evangelio di locual boso a ricibi, cu e sea maldiciona.
Esey ta nifica cu manera nos a ricibi e palabra di Dios, asina nos tin di siña nos yiunan pa nan tambe aplica e palabra di Dios den nan bida, no wak ni na links ni na rechts, pero pone bista firme riba Cristo Hesus kende ta nos Salbador.
Ta hopi cos ta sosode cu nos hobennan, cu ta parce manera tin mayor ta freelance, nan no ta tuma e encargo cu Dios a duna nan na serio. Nos tur como mayor tin un deber dilanti di Dios, di pone nos yiunan den oracion y tambe siña nos yiunan con haci oracion. Pasobra locual tin riba caya no ta un wega, ta guera diabolico.
Ta tur caminda e enemigo ta purba penetra y e mayornan ta esunnan cu ta yama na prome luga pa defende nan teritorio spiritual di famia y no permiti, ni apoya nada cu contra Dios su palabra den boso hogar.
Ta tempo pa para firme, ta tempo pa busca cara di Dios, no permiti ningun clase di maldicion, ningun clase di bagamunderia, no ta importa for di ken e ta bini, no ta importa ken kier introduci e diablura, corda bon cu Josue a bisa: Ami y mi cas ta sirbi Señor.
Den e tempo trabahoso aki, nos tin di persevera, para pa Dios su palabra manera Daniel a haci. Y Dios mes lo sali na nos defensa.
Ora nos persevera, Dios ta warda nos.(Revelacion 3:10).
Sinceramente,
Pastoor Marcel Balootje.
