Di acuerdo cu Banco Central di Aruba, e entradanan total di Gobierno di Aruba a cay cu 46.7 miyon florin na luna di juli 2020, cu ta nifica un caida di 35.5% compara cu e mesun luna pero aña pasa na 2019. Esaki tabata debi na caida di 88% den non-tax revenues, un caida di 28 miyon florin compara cu juli 2019.
Tambe ta raporta caida di 29% di tax on commodities, specialmente invoerrechten cu ta u caida di 6 miyon florin y tambe un reduccion di 45% den entrada di BBO, cu a cay cu 8 miyon florin.
Si analisa e prome shete lunanan di e aña aki, den cual ta pone e entradanan di aña pasa banda di esunnan di e aña aki, anto ta haya un miho bista di con e situacion a empeora. Aunke cu e impacto a cuminsa na luna di maart, ta e lunanan cu a sigui despues a traduci den caida abrupto di entradanan di Gobierno.
E entradanan total di Gobierno di Aruba a cay cu 30.2%, cu ta nifica un suma di 255 miyon florin. Esaki si conta cu aña pasa na 2019, Gobierno tabatin entradanan di 884.2 miyon florin y e aña aki el a alcansa apenas 589.6 miyon florin. Tene cuenta cu esaki ta cifranan preliminar y por cambia ainda.
E entrada total di Gobierno di Aruba den henter aña 2019, tabata di 1,402.400.000 florin (1.4 biyon). Si e desaroyo aki di caida continua manera e ta bayendo actualmente, anto ta pronostica cu na fin di aña 2020, e caida lo ta entre 300 pa 400 miyon florin compara cu aña pasa.
Pa mas informacion por subi e website di Banco Central di Aruba. https://www.cbaruba.org/cba/readBlob.do?id=6844
