Algun luna pasá, pisina SDK a keda dediká na Enith Brigitha (Kòrsou, 1955); entrante dia 17 di òktober lo tin un buki tokante Enith na benta na bukhandelnan na Kòrsou: 'Enith Brigitha, zwemmen in de schaduw van doping'. E promé diesinku añanan di su bida, Enith a landa na Kòrsou kaminda tres biaha ela resultá e partisipánte muhe mas lihé den kompetensia na Spaanse Water (tres kilometer). Durante Weganan di Reino ela logra bati Hulanda dos biaha ku medaya di oro. Despues ku ela bai biba na Hulanda na 1970 ela
bati tur hende den pisina den korto tempu. Dos biaha ela keda nombrá Muhe Deportivo di Aña (1973 i 1974) i e tabata e promé landadó di koló na mundu ku medayanan olímpiko.
Kasi semper Enith tabata toka punto final promé ku tur otro; a menos si partisipante muhé di DDR tambe tabata kompetí. Den sekreto Alemania Oriental tabata duna nan doping. Yená ku
hormona, e landadónan Aleman Oriental a hòrta hopi medaya di oro foi dilanti Enith su anishi. Apesar di e kompetensia inhustu aki, na 1976 Enith Brigitha a gana dos medaya di bròns na Weganan Olímpiko na Montreal. Bròns ku realmente mester ta oro si kita e medayanan for di DDR pa motibu di doping. Den e biografia 'Enith Brigitha. Zwemmen in de schaduw van doping' e outor Jeannette van Ditzhuijzen no solamente ta deskribí bida di Enith promé, durante i despwes di su karera den landamentu, pero tambe e ta elaborá riba doping den DDR: kon e sistema tabata traha i ken tabata disidí.
