Empleadonan di Denny’s a haya sa di cierre dos dia pasa

2574

Restaurant Denny’s a cera su portanan prome cu el a habri oficialmente. Y awo tin un grupo di persona cu tabata traha eynan, den un situacion dificil: sin trabou. Mescos cu hopi otro cu ta traha den sector liga na turismo y otro sectornan. E cierre di frontera di Aruba pa algun luna, tabatin su efecto riba economia di Aruba.

Segun un di e empleadonan a splica, sra. Sarah Prince di Denny’s no ta dunando cara na ningun di e trahadonan. “E ta sconde y gaña y ta tira culpa riba otronan. El a cera e restaurant luna pasa sin bisa nos nada, te antayera. Y nos no a haya placa di Gobierno tampoco,” e empleado aki.

Trahadonan di Denny’s ta exigi nan derecho. A cera e restaurant pero doño for di Corsou no ta responsabilisando pa su trahadonan

Posted by 24ora on Tuesday, June 30, 2020

Nan ta simplemente pidi sra. Prince pa duna cara na e situacion aki. Tabatin casi 30 trahado y na ultimo a keda solamente 12 trahado. Pues no ta tur tabata registra na SVb y esaki a causa cu nan no tur a bini na remarca pa subsidio di salario ni FASE.Un otro empleado a bisa cu ta dos dia pasa nan a bin tende cu Denny’s ta cera. Pa colmo, nunca a haya payslip y como cu e tabata den su periodo di prueba, e no tabata registra na SVb tampoco. “Nos tambe merece di haya e 950 florin,” sra. Ras a splica.

Nan a haya informacion cu tin movecion andando na e restaurant aki situa den Cove Mall den sector hotelero. Ta parce cu ta sacando mobilario pa warda nan otro caminda. Nan no sa si e ta pensa di bandona Aruba sin paga loke el a keda debe e empleadonan. Operadornan a bisa cu nan no tin placa pa paga huur di e luga, pa cual nan mester a cera nan portanan.