Director di Arubus N.V. a informa e empleadonan cu tin di sigui entrega y e biaha aki 12.6 porciento di nan salario. E empleadonan di Arubus no ta contento cu esaki y a informa gerencia riba esaki.
E director a splica nan cu esaki ta conta tambe p’e mes. Desde cu Aruba su situacion financiero a bay atras y pa por a haya yudansa di Hulanda, a bin algun condicion. Un di nan tabata baha tanto porcentahe di salario di empleadonan publico y compania estatal. Y segun gobierno, e porcentahe kita tabata destina pa bay den e fondo di FASE pa yuda esunnan cu a perde trabou.
Pero WEB a indica cu mayoria compania estatal no a cumpli di pone esey den e fondo y a mustra cu un di nan ta Arubus. E momento cu esaki a bin afo, Minister di Finansas, Asunto Economico y Cultura a bisa cu el a papia cu companianan estatal cu no a aporta. Segun e companianan a informa cu a kita e porcentahe, pero no por pone den fondo di FASE pa motibo cu despues nan mes ta bay tin mester di esaki si e situacion bira pio. Minister di Transporte, Chris Romero, a informa cu Arubus a aporta na FASE desde principio y no ta algo cu lo cuminsa awo.
Aña pasa e empleadonan di Arubus a bay di acuerdo pa entrega y a cumpli, pero no ta di acuerdo pa entrega 12.6% di nan salario. Esaki ta pasobra nan a scoge pa entrega por ehempel nan bonus completo. Tambe nan a informa gerencia cu aunke a bisa nan cu mester entrega e luna aki, nan no ta entrega nada te ora cu keda cla cu e parti di CAO.
Un otro situacion cu ta trece pregunta pa loke ta trata Arubus N.V. ta kico a pasa cu e otro mita flota di busnan nobo. E prome flotanan di busnan nobo si a yega, pero te cu e fecha di awe no a bin cu e restonan. A purba di haya director di Arubus N.V. y minister pa puntra riba e busnan nobo, pero no a haya un contesta.
