Proyecto nobo di ASU treciendo hobennan hunto

405

For di aña pasa Aruba Sport Unie (ASU) tin un proyecto den pipeline,  cu nan kier a lansa for di aña pasa. Pero debi na COVID-19, a a haya nan obliga pa want’e.

Mirando e situacion cu ta bibando actualmente, den comunidad a bolbe trece e proyecto aki bek dilanti, bay bek cerca instancianan cual tabata tin contacto caba den pasado riba e proyecto aki y a cuminsa move.

Gerald Franca, presidente di ASU, a menciona cu e proyecto aki yama “Pone deporte riba mapa (electronico)”. Ta algo necesario pasobra nos ta na Aruba y tin 20 mil hoben entre 6 y 20 aña. E hobennan aki kier acerca nan, pasobra ta haya cu e ultimo 3 pa 4 siman ta tende hopi cos cu ta pasando.

Informacion cu ta yega cerca ASU di e diferente instancianan ta cu e situacion ta hopi caotico. El a bira mas caotico door cu e hobennan ta cera paden, nan ta haya psicosis, etc. Cu esaki ta motiva nan den un direccion.

Ta un dilema cu tur ta mira caminda cu muchanan ta cay den droga, hortamento, matamento, e cos aki ta birando un problema cada dia.

E proyecto cu tin aki ta pa analisa, evalua e areanan cu ta existi na Aruba, e diferente districtonan pa mira e diferente hobennan cu tin, wak kico nan ta haci. Ora cu cuminsa mira numbernan bek, ta yega na mas of menos 10 mil hoben ta practica deporte.Pero e ora ta yega na 10 mil cu no ta haci’e. ASU  kier wak pa yega cerca e hobennan aki, pa mira kico ta nan necesidadnan.

Esaki por ta varios. Na e momentonan aki no sa exactamente kico ta kico, pero sa cu nan tin hopi tempo liber debi na e situacion cu a presenta. Hopi di nan ta pafo of paden, nan no sa kico pa haci. E idea ta pa yega cerca nan pa wak kico ta nan necesidad, kico nan tin mester y pa ASU cuminsa yuda nan.

Hopi hende ta puntra cu si haya e hobennan aki, kico lo haci. ASU kier haya informacion prome. Unabes cu tin informacion ta analise y evalue y mira kico exactamente ta nan necesidad.

Franca ta sigui splica cu tin varios instancia interesa den e proyecto y a acerca nan caba. CBS ta un di nan. Tin otro instancianan di Gobierno y tambe scolnan. E instancianan tur ta interesa, minister ta interesa, SSA ta interesa. Ta informacionnan cu tin cu bay traha riba nan. Ta un proyecto cu ta encera henter Aruba.

Ta bay tackle e universo di hobennan aki. Kier sa directamente di scol y barionan. Hopi mucha no ta bay scol. P’esey tin cu wak den e barionan ken nan ta pa por yega cerca nan. No mester lubida cu tin hopi hoben cu a bin di mayornan cu ta na cas. Kier mira e mayornan tambe.

Proyecto nobo di ASU treciendo hobennan hunto

Proyecto nobo di ASU treciendo hobennan huntoClick link pa mas: https://24ora.news/3qmHZwp

Posted by 24ora on Thursday, January 14, 2021

Kier wak kico e barionan tin pa brinda nan. No solamente e muchanan ta haci cierto deporte, si no tambe si tin infrastructura, tin facilidad pa haci deporte of otro.

Sa cu e situacion ta fastioso for di informacionnan acumula. E cos aki no ta facil, segun Franca y tin basta contratiempo.

Ferdinand Robert, miembro di directiva di ASU y coordinador di e proyecto, a splica cu na momento cu e proyecto a keda introduci cerca dje, el a haya e tarea grandi aki, sin pensa el a tuma e reto.

E ta masha contento cu ASU a tuma e iniciativa pa cuminsa cu proyecto aki en principio, cu sigur e resultadonan cu por beneficia diferente instancia y organisacion, cu lo por haci uzo di e resultado di e investigacion cu ta bay haci.

Robert a agrega cu ta di suma importancia, mirando cu e situacion cu ta pasando aden, y cu tabata tin un aña tiki fastioso. A habri e aña mas fastioso ainda. A bira momento pa haci algo al respecto. Pa e motibo ey Robert ta contento cu ASU a haci algo pa ataca e problematica. Tin un problema y ta momento pa busca kico ta e fuente di e problema.

Hopi hende envolvi

Tin varios hende envolvi den e proyecto aki, cuminsando na cas mes. Robert a menciona cu ta un trabao den conhunto. Cada persona tin cu pone di su parti. Educacion ta cuminsa na cas. No por spera cu riba caya ta educa e yiu. Asina e idea ta pa crea no solamente deportista, pero bon ciudadano. E hobennan ta e futuro di nos pais y na e momentonan aki, e futuro ta un poco fastioso pa bisa.

A yega ora pa traha hunto na e investigacion aki, colabora cu henter e investigacion y esnan envolvi, esta bestuur di ASU y tur e otronan cu ta forma parti di esaki, sigur e resultadonan lo ta e contesta na hopi pregunta cu lo tin.

Robert ta gradici ASU pa e confiansa den su experticio. Sigur e ta spera cu por haya luz berde di e partnernan, scol, gobierno, minister di enseñansa mes. Ta spera cu por haya e colaboracion di nan pa por eherce y start cu e proyecto aki mas pronto posibel.