A kere na prome instante cu el a bira malo tras di stuur pero a resulta cu alcohol tabata su remedi. Chauffeur a sali bay dal stret den e vangrail band’i Wen Kee na Santa Cruz.
Esaki a tuma luga aproximadamente 2:00 pm den cercania di e crusada di Wen Kee direccion Piedra Plat. Chauffeur manehando un Nissan Sentra cora a accidenta y bay dal den e vangrail. A pidi presencia di polis mirando cu e persona e resulta herida. A kere cu el a bira malo tras di stuur y lo tabatin mester di asistencia medico pero a resulta lo contrario.
Testigonan a indica cu, su so cu su so a baha bay na su man robes, dal un borchi di trafico, bent’e abou y a dal contra e vangrail. Na yegada di e paramediconan a controla e chauffeur y a resulta cu e no tabata malo pero si tabata seriamente bou influencia di alcohol. Polis a detene e chauffeur na e sitio y transport’e pa warda di polis. E no por a ni cana riba su pianan mas.
