Un par di luna pasa hopi hende a puntra mi si mi lo bolbe bek den arena politico y si ta asina cu con of cu ken. Manera mi informa pueblo 4 anja pasa cu, despues di un evaluacion hunto cu directiva di MSI, a tuma e decision di no bolbe participa cu MSI na e momento ey dor di diferente circumstancia. Mi a contesta cu, aunque mi conviccionan social ta bibo y pa un futuro no ta exclui nada, e biaha aki tampoco mi persona, lo no participa ni cu MSI, ni riba lista di otro partido. Manera eleccion ta asercanda awor cada dia mas, mas y mas hende ta hasi mi e pregunta con mi persona ta wak e eleccion. Na e momentonan aki den mi humilde opinion tin 4 partido cu lo por jega na asiento, AVP, MEP, POR y RED. Despues di Status Aparte na 1986 te cu 2001 nos a conoce diferente coalicion. Eynan mester a conclui cu hopi biaha e poder di e partido mas chikito den e gobernacionan tabata hopi mas grandi cu realmente nan apoyo electoral. Hopi biaha pa por sigi goberna e partidonan mas grandi, esta MEP y AVP mester hasi concessies pa por sigi goberna y cu no tabata na bienestar di nos pais y hasta asina diferente gobierno di coalicion a kibra y cai. Lamentablemente hopi biaha eynan tambe pa motibonan cu mester conclui cu no tabatin nada di haber cu bienestar di nos digno pueblo. Desde 2001 nos a haya gobiernonan di un solo signatura, prome 8 anja di partido MEP y awor ta cera 8 anja di partido AVP. Por bisa cu nos ta dilanti porta di una era nobo. Esey ta conta igual si e gobierno actual ta sigi of si nos lo haya un coalicion, pasobra esey ta e unico dos opcion cu mi persona ta wak real.
Sin acusa ningun partido den particular mester conclui cu e situacion financiero actual di Aruba ta nada florisante. Mi persona ta wak e motibo principal di esaki ta cu nos ta un pais hoben y nos mester a sinja cana prome, tambe riba e tereno ey. E debe actual di mi concepto ta un accumilacion di decisionnan eroneo di e diferente gobiernonan desde 1986 y falta di suficiente ayudo specialisa, especialmente den principio di madre patria Holanda. Nos pueblo ta costumbra cu e partidonan ta purba culpa otro di e debe cu tin actualmente, pero di mi concepto esey ta, pa un gran parti, politikeria, aunque si tin decisionnan cu a wordo tuma e ultimo 31 anja cu di berdad ta hopi kwestionabel y mas bien a wordo tuma pa motibonan politico partidista y no pa bienestar general. Mi opinion si ta cu e gobiernonan di un solo signatura por a funciona miho cu esun di coalicion, aunque en berdad tambe ta cu poder ta y a corumpi. P ami ta cla y raspa cuesaki mi NO ta referi na e caso IBIS na unda un minister ta sera. Mi ta kere cu henter pueblo ta conciente ta casi desde 1986, pero sigur desde e anjanan 90 e cuestion di permiso den un of otro forma tabata un negoshi pa hopi hende incluyendo politiconan. Cu e minister actual a hasi su mes culpabel lo ta pa un huez dicidi, pero den mi opinion esaki no mester y no lo y no mester afecta e resultado di e eleccion vendidero.
Pa un gobierno di solo signatura ta funciona democraticamente lo mas esencial ta pa e gremionan di control manera Algemene Rekenkamer, Raad van Advies etc. mester wordo repeta y funciona debidamente. Eynan tambe desde 1986 den tur gobierno tabatatin momento cu esaki no a sucede y asina a duna oponente político un “stok om mee te slaan”.
Honestamente mi tin cu bisa cu mi a y ta wak un desarrollo positivo den e arena politico, na unda, cu of sin presion di Holanda, mas y mas e bienestar general realmente ta bira e prioridad di mas y mas político. Mi bisa caba ningun di nos ta nace y ta cana bai, mescos cu cualquier pais hoben nos mester a gatia, pa poco poco no por cuminsa cana como pais.
E gritonan di politico cu si AVP ta keda Aruba lo caba na nada of si MEP ta bin den gobierno Aruba lo zink mi ta pone un banda. Personalmente mi problema cu partido MEP, den cual tin diferente amigo y hende cu mi ta respeta hopi, a pesar cu a renoba e partido hopi, e man invisible di e generacion bieuw tey keto bai, locual ta duna mi un cierto miedo, mas mi mes a experiencia e poder y venganza di nan y ta sufri e consecuencianan te dia di awe, den partido POR mi ta wak e problema di e partidonan chikito di pasado na unda exigencia pa forma un coalicion lo por surpasa e sosten electoral cu sigur lo haya di e comunidad. Na e momentonan aki mi no ta wak partido RED den gobernacion di coalicion pa e solo motibo cu e diferencia di opinion riba algun topico principal lo hasi un coalicion imposibel. Manera mi a bisa caba personalmente, a pesar cu mi ta conciente di e riesgo di tin poder den un solo man, mi lo prefera un gobierno di un solo signatura, na unda duna respet pa e gremionan di control lo ta di suma importancia si. Mirando e desaroyo di e ultimo anjanan, mirando tur e proyectonan cu ta canando, mirando e trabou dificil pa sana Aruba financieramente cu a cuminsa tuma mas forma y ta canando bou di un minister actual Sr. mr. Bermudez, un specilaista riba tereno financiero proba cu no ta depende di politiek, y e otro retonan dificil cu Aruba tin su dilanti, personalmente mi ta di opinion cu e gobierno actual mester a lo menos sigi pa 4 anja mas pa termina e trabounan y proyectonan cu a wordo inincia y cu ta hiba nos pais dilanti si nan por wordo ehecuta completo. Akinan mi ta jega tambe na e punto con mi persona ta wak e eleccion, sin tene cuenta cu mi preferencia, paso ta pueblo completo lo dicidi democráticamente. Mi ta kere cu AVP lo haya 9/10 mas 2, MEP lo haya 7/8 mas 1, POR lo haya 2 y mi no por descarta e posibilidad cu RED lo haya 1, locual lo tin su efecto ariba e restzetels, pero tog mi ta wak cu AVP lo jega na e minimo di sigi e gobernacion aki. Di corason mi ta spera despues dia 22 di september a vota conciente y cu bienestar di nos pais na pecho nos pueblo por uni bek, pasobra na final e gobierno solamente cu e sosten di nos pueblo por hiba Aruba padilanti.
