Den e conferencia di prensa di diaranson ultimo, parlamentario di MEP, Edgard Vrolijk a
trece padilanti e situacion pa loke ta e conversion di Dienst Publieke Scholen (DPS) den un
fundacion, manera vocifera pa e minister di Enseñansa. Locual a resalta ultimamente ta, cu
tin hopi incertidumbre riba e asunto aki cerca pueblo y specialmente bao di e maestronan.
Segun sr. Vrolijk, siguramente e minister tin su bon intencion, pero falta di informacion
concreto pa pueblo. Ta den e cuadro aki su persona a manda un cantidad di pregunta por
escrito pa e minister concerni y p’asina haya contesta y consecuentemente trata di kita e
incertidumbre reinante bao di e grupo di DPS . Entro otro el a haci e siguiente preguntanan na
e minister:
1. Ki dia minister tin pensa di cuminsa cu e fundacion aki?
2. Kico ta e structura di e fundacion? E personanan ta bin cu gobierno y ta bay cu e
gobierno?
3. Cual ta e perfilnan di e hendenan cu lo bay traha eyden? Mester tin un structura di ken
lo bay pone eynan. E motibo ta cu esaki ta un trabao serio, fuera di influencia politico
y cu mester tin su debido control financiero.
4. Kico ta e posicion huridico di e trahadornan? Esaki ta e preocupacion di mas grandi y
a crea hopi incertidumbre. E trahadornan lo bay atras den salario? LMA lo no conta
pa nan mas?
5. Con e subsidio pa e fundacion aki lo sigui core den futuro? E lo keda mescos of lo
cambia? Con e status di e otro fundacionnan lo bay ta? Lo bay tin solo liña di trabao?
Sr. Vrolijk ta pidi e minister pa sali y duna informacion concreto Tambe lo mester splica
kico ta e beneficionan di e cambio aki, ya cu e trahadornan ta bay di DPS pa cay bao di un
fundacion. Kico ta e ventahanan extra pa e trahadornan?
E parlamentario a sugeri tambe pa e minister acerca e actornan principal, esta pa sali y combersa cu e sindicato y trahadornan.
Nan merece un splicacion, ya cu transparencia ta hopi importante. E tempo tambe ta hopi
importante pa e trahadornan por tuma un decision, ya cu por ta tin algun di nan cu lo kier bin
na remarke pa un overplaatsing.
