E test cu Su Altesa Real Prinses Beatrix di 83 aña di edad a haci di Coronavirus a sali positivo, segun Rijksvoorlichtingsdienst (RVD). El a haci e test debi cu e tabatin un verkoud leve y e resultado a indica cu e miembro di famia Real, mama di Su Mahestad Rey Willem Alexander ta contagia cu e virus.
E prinses di 83 aña di edad ta den cuarentena y segun RVD, e ta cumpli cu tur norma di un pashent cu sali positivo. “A informa e personanan cu tabata den contacto estrecho cu prinses Beatrix,” asina RVD a informa.
Beatrix tabata na Corsou siman pasa pa un bishita di trabao. Eynan el a bisa prensa cu ya el a vacuna cu e ‘booster shot’. Ta bon pa menciona cu Minister Ursell Arends di Aruba tambe tabata na Corsou pa atende e mesun evento aki di naturalesa den Caribe Hulandes.
E ta perde cumpleaños di su nieta
Prinses Beatrix ta den cuarentena y esey ta nifica tambe cu e lo perde e cumpleaños di su nieta Amalia, kende ta cumpli 18 aña di edad diamars awo. E wela lo no por brasa su nieta, ni dun’e un sunchi manera e lo desea, awo cu e ta bira un adulto, den preparacion pa tuma e corona Hulandes dia cu su tata dicidi di baha for di e trono.
Tocante Prinses Beatrix
Su nomber oficial ta Beatrix Wilhelmina Armgard, Prinses der Nederlanden, Prinses van Oranje-Nassau, Prinses van Lippe-Biesterfeld. El a nace na Baarn, na Hulanda, dia 31 di januari 1938. E tabata Reina di Hulanda entre 30 di april 1980 y 30 di april 2013. E ta e yiu mayo di Reina Juliana y Prins Bernhard van Lippe-Biesterfeld y desde aña 2002 e ta viuda di Prins Claus der Nederlanden. Prinses Beatrix tin dos nacionalidad, esta Hulandes y Britanico.
