Diadomingo awo, dia 20 di November ta Dia Internacional di Derecho di Mucha. Durante henter luna di november, ta pone extra atencion riba e derechonan.
Dia 14 di november ta dia mundial di Diabetes, p’e motibo aki, den colaboracion cu Instituto Biba Saludabel (IBISA) kier a enfoka riba Articulo 24 di e Tratado.
Sigun articulo 24 di e tratado di derecho di mucha: tur mucha tin derecho riba cuido di salud y suministro p’e tratamento di malesa y recuperacion di salud. Nos como cuidadano di Aruba, tin e obligacion como estado cu a firma e tratado, pa yuda realisa esaki pa e bienestar y futuro di nos muchanan.
Articulo 24 di e tratado di derecho di mucha ta menciona: Nos como estado tin e obligacion pa tuma e medidanan adecua pa combati malesa, desnutricion y mal alimentacion bou nos muchanan. Tambe den cuadro di cuido di salud di prome liña, door di entre otro aplica tecnologia disponibel y door di suministra cuminda cu suficiente contenido nutritivo y awa potabel limpi, considerando e peligernan y risico di contaminacion ambiental.
Ademas, articulo 24 di e tratado di derecho di mucha ta menciona: cu nos como estado tin e obligacion pa desaroya informacion tocante cuido di salud preventivo, guia pa mayor y facilidad p’e planeamento di famia. Aruba ta conta cu diferente organisacion manera Instituto Biba Saludabel y Activo (IBiSA), cu ta brinda nos comunidad e sosten y apoyo p’asina nos por bira un comunidad mas sano.
Articulo 24 di e tratado di derecho di mucha ta menciona cu nos como estado participante tin di tuma tur medida adecua pa elimina custumbernan tradicional cu ta dañino pa salud di e muchanan. Esey ta trabou di nos cada un como cuidadano. Ban educa nos muchanan for di chikito caba tocante e importancia di come salubabel y haci movecion. Ban preveni malesanan manera diabetes bou nos muchanan. Yuda nan haci e bon escogencia ora ta trata di co’i come y co’i bebe. E muchanan ta imita loke nan mayornan ta haci. P’esey, ban sea e bon ehempel pa nos muchanan.
IBiSA ta recomenda:
- Desayuna tur dia prome cu sali di cas.
- Come 2 fruta pa dia di diferente color.
- Come 3 cuchara (mita di bo tayo) di berdura pa dia.
- Bebe 6-8 glas di awa pa dia.
- Haci movecion por lo menos un ora pa dia.
Pa informacion of pregunta por acerca Fundacion Pa Nos Muchanan – Cumana 2
Tel: 5834247/5880856 – Whatsapp: 6998900
E-mail: [email protected] – Website: www.fpnm.aw
