Mirando e temporada di gradici, comparti y regala cu nos ta den y a peticion di comunidad general, Fundacion 1403 ta extende e campaña di regala un buki na tur scol te cu fin di aña.
Hopi ta esnan cu a mustra interes pa participa den e proyecto comunitario (Community Partnership Project) di Fundacion 1403 y su partnernan den contexto di e Metanan di Desaroyo Sostenibel (SDG’s) di Nacionnan Uni, pa regala e bibliotecanan di tur scol un Catalogo di Pintura Indjan.
Publico a intercambia cu arkeologo Harold Kelly y registrador di coleccion Francisco Croes durante un pop-up na Baz-RRR den centro di Oranjestad recientemente y a cumpra nan ehemplar. Tur esnan cu a cumpra un ehemplar a haya un sticker pa pone nan nomber. E sticker aki lo ser poni den un otro buki y F1403 lo regala esaki na un scol proximamente.
E catalogo ta disponible na Museo Arqueologico Nacional Aruba den Schelpstraat, na Plaza Bookstore, na De Wit & Van Dorp y na Bruna. Si tin compania cu ta desea di cumpra e catalogo pa nan relacionnan, por tuma contacto cu F1403 via nos pagina di FB of email na [email protected]. F1403 ta gradici un y tur cu a hasi e publicacion aki posibel y esnan cu ta sostene e campaña.
