Awe nochi pueblo a haya oportunidad pa tuma despedida di Padu Lampe, co-autor di himno di Aruba kende a fayece riba diahuebs, 28 di november ultimo na su cas. Padu tabatin 99 aña di edad.
For di momento di su fayecimento por a scucha solamente palabra di elogio y admiracion pa Padu, kende a hiba un bida ehemplar y un artista riba diferente tereno.
Artistanan local, di chikito te na grandi a honra Padu. Tabatin presentacion di Coro di Maybelline Arends cu su Coro Tutti Fruti; Pierewietje; caha di orgel; Fundacion Bernadina Growell bou di liderazgo di Lena Orman; Muchanan Sabi bou direccion di Edselyne Figaroa; Scol di musica harpa y cuarta bou direccion di Edgar Kelkboom; De Trupialen bou direccion di Elmer Pieters; presentacion di Festus Bargues; Nelson Tromp cu e cancion Juan Chabaya; Nico Connor cu su sweet pan music; Shannon Bueno acompaña pa su tata Luis Bueno cu e cancion ‘Al final’ y Jack Tromp.
E presentacionnan aki a bini prome cu a toca himno nacional y discurso di Minister di Finanza y Cultura.
Den e di dos parti tabatin presentacion di artistanan manera di Livio Hermans cu e cancion “Soledad”; poesia presenta pa Belen Kock-Marchena; Eliyah Tjie–A–Loi y amigonan cu e cancion “Si ainda bon’n conoce Cristo”; baile Rosea Cultural; Cesar Olarte cu Jonathan Viera “Pakico”; Albert Croes, Famia y amigonan di Padu; Jossy Brokke; Victor Samuel cu e cancion “Noelia”; Edwin Abath cu e cancion “Mi’n sa”; Sharon Rose “Nami un chens”; Poema di Ruthy Vrieswijk declama pa Jhon Freddy Montoya; Club di Movimento bou direccion di Samantha Westera Jupa; Edjean Semeleer cu e canion Nostalgia Navideño acompaña pa Johnny Scharbaay; Robert Jeandor cu e cancion For dia m’a mirabo; Claudius Phillips cu e cancion “It’s well with my soul”; Ced Ride; Recital di Piano; Alejandro Gonzales cu e cancion Biblioteca; Victor Camacho “Stephany”; Norman Moron; Johnny Scharbaay; Landa Henriquez compaña pa orkesta Sandunga cu un Potpourri.
Y finalisa cu un grupo di cantante cu a presenta un cancion di despedida.
Biografia
Juan Chabaya Lampe, conoci pa tur hende como “Padu” a nace dia 26 di april 1920 y a fayece 28 di november 2019 na Aruba. Padu a caba di celebra 99 aña di edad algun luna pasa. El a bira popular den Antias Hulandes y den Caribe como pianista, cantante, autor y pintor.
E ta conoci pa su nomber artistico Padu del Caribe. Juan Chabaya Lampe a wordo yama door di su padushi y el a haya e nomber di cariño Padu.
Padu a casa cu Daisy Croes na aña 1946. E tin un yiu cu yama Vivian Lampe y e tin dos nieto chikito. Poco artista local a bira hopi famoso manera Padu del Caribe. Su composicion cu el a haya di su mesun estilo supremo ta hopi conoci na Antias Hulandes, Venezuela, Colombia, Merca y Hulanda.
Na solamente 9 aña di edad Padu tabata tin hopi interes pa musica, pasobra el a lanta den un famia musical. Padu su Tata Harry Lampe tawata tocado di piano y tawata lesa nota musical. E tata di Padu a forma un grupo chikito cu su rumannan.
Zep Lampe (fluit), Olivier Lampe (violin),Wim Lampe tawata toca cuarta, wiri y piano. E famia Lampe tawata biba na Nassaustraat. Ora e famia tawata hunto, nan ta traha cantica y esey tawata hopi agradabel.
Semper tawata tin hende ta para pafo pa scucha y ora nan caba di toca, nan tawata bati man pa duna e tocadonan mas smak pa sigui toca. Ora Padu tawata chikito na un cas scuchando un bunita cantica di e piano y e ta scucha Rufo Wever toca e piano Padu cu su 8 aña y Rufo Wever cu su 11 aña hugando. Padu a bis’e: “ami tambe kier toca asina”. Esey tabata e nacemento den un amistad largo.
Despues di piano cu el a siña caba Padu a cuminsa practica cuarta, violin, mandoline y klarinet. Despues di un tempo di les di piano, Padu a cuminsa haya poco poco su mesun ritmo y estilo. For di e edad hoben di 16 aña, el a cuminsa toca pa publico. Padu a concentra riba su piano y compone musica cu e cuarta. prome e melodia, compone musica riba e cuarta, despues practica riba e piano y pa ultimo e ta skirbi e texto. Asina e tawata hacie. el a demostra cu e por bon den otro ritmo manera merengue, dansa, bolero, mambo, twist rock y swing.
Hunto cu Rufo Wever, Padu a skirbi y saca e wals Aruba dushi tera na aña 1976, cu a bira oficialmente e himno Nacional di Aruba.
