Algun rato pasa a drenta informacion cu agente policial Chariselle “Charri” Maduro a recobra su libertad despues di un par di ora di interogacion. Parce cu su ex pareha/casa a keh’e cu e lo tabatin municion di mas den cas. Di otro banda, e casa tabata cera algun dia atras pa violencia domestico. Ta parce cu e caso aki ta mas bien un asunto pasional.
No mas cu den e ultimo luna aki, na dos ocacion a pidi asistencia di su coleganan na su cas, pa motibo cu su pareha ta maltrat’e. E di dos biaha e situacion a bay asina for di man, cu a detene e homber y a encarcel’e. Pero pa falta di keho di su pareha, mama di su yiu, a opta pa laga e sospechoso den libertad. Consecuentemente e Polis a bay for di cas y esey obviamente no a cay den bon tera cerca e homber. Den un forma di “pay back”, a bay keha su mesun pareha y hink’e den un problema penal awor y posiblemente disciplinario cu su trabou.
Cuerpo Policial Aruba no a duna mas informacion di e caso, no a bay en detayes tampoco si lo tabata tin of si lo a kita cualkier cargo den su contra. Unico informacion cu a ricibi te cu awo ta cu e ta den libertad y cu a finalisa e interogacion.
Tur locual cu sa ta cu Landsrecherche trempan, a detene e agente bou sospecho di tin arma of municion extra cu no ta esun oficial di Polis of di lo a horta arma. Un acusacion serio contra un agente hoben.
Cuerpo Policial a informa cu a detene e agente policial sospecha di “Verduistering” y articulo 3 di “Vuurwapen Verordening“ di nos codigo penal. A bisa e Polis su derechonan y a pasa pa cuminsa e proceso di interogacion cu a finalisa den careda atardi.
