Hopi biaha e duanero ta blanco di critica, specialmente pa nan orario di trabou y e facilidad pa dicidi pa no traha. Asina algun dia pasa a critica nan feros pasobra nan a opta pa no sali traha debi na poco awasero. E tempo ey hopi a comenta riba Facebook cu si nan ta biba na Hulanda, nan lo no por traha mes pasobra ey awasero ta cay cu regularidad, anto henter dia.
Un ciudadano sinembargo a manda nos un potret diasabra ultimo, pa demostra con por lo menos un duanero tabata trahando den pleno awasero na Wayaca. A compronde cu na San Nicolas tambe trabou a sigui normal. For di un duanero a compronde cu nan no tin problema pa traha den awasero, tanten cu e container ta bou di un dak. Ta imposibel pidi di e duanero pa traha bou circunstancianan asina, esta den awasero.
Di otro banda, nan ta consciente cu temporada di fin di aña a yega y comercio ta bestel producto pa nan por bende. Duana ta hunga un rol importante den “clear” e carganan, pa garantisa cu e comerciante ta paga loke el a bisa di ta importa. Door di ofrece un servicio rapido, mas carga ta drenta Aruba, mas placa ta drenta caha di gobierno y mas facil comercio por pone producto na benta. Cu esey den mente, nan no tin problema pa hasta traha den fin di siman, pa yuda baha e presion di tanto container cu ta yegando nos isla cu carga pa comercio.
