DTI ta corda contratistanan pa sigui reglanan den “Normal Nobo”

671

Dienst Technische Inspecties a anuncia cu den e “Normal nobo” e seccion di Veiligheidsinspectie lo sigui cu inspeccion y control riba proyectonan di construccion pa por sigui garantisa siguridad. Afdeling Veiligheidsinspectie en onderzoek (VI&O) ta controla primordialmente e siguridad di e trahado na pia di trabou. Durante DTI su bishita na e luga di construccion, hopi biaha e compania of trahado no ta cumpli cu tur e reglanan di siguridad existente.

Adhunto un par di conseho y observacion pa tur trahado of compania cu a cuminsa bek den construccion:

Algun peligernan pa tene cuenta cune durante un construccion ta;

  1. Trabou di haltura
  2. Mashin cu ta draai
  3. Coriente
  4. Material cu por cay of sali bula
  5. No haci uzo di proteccion personal (PPE’s)
    Ta importante pa tur stelashi:
    a) Wordo arma manera fabrica ta prescribi cu tur dos sker pa stabilidad y cu e stelashi ta den bon condicion.
    b) Pianan ta nivela riba vloer y ta bon ahusta
    c) Despues di 3 element e mester wordo ankla na e structura of geschoor pa stabilidad
    d) Plankinan di 60 – 80 cm pa para riba dje, toaboard y cu leuning pa lomba
    e) Tur planki mester tin un stop (klos) bou di dje pa evita pa e planki sali cay for di e stalashi y mester ta claba na otro
    f) Stelashi cu ta mas halto cu e edificio mester wordo geaard pa bliksem
    g) Trahadonan mester tin nan safety harnass na tur momento bisti y mara na e stelashi
    h) Trahado no mag di mara su mes na e sker nan di e stelashi pero na e structura cu ta stabil y por absorba e caida
    Pa trapi di metal:
    a) E trapi ta wordo uza pa bay di un luga pa otro y no pa traha riba dje
    b) E trapi mester steek uit 1 meter
    c) E trapi mester wordo bon sigura, pa evita e slip
    d) E trapi ta den bon condicion
    e) E trapi no mag di “buig” haya un barica ora di subi e trapi
    f) E trapi no mester wordo poni riba un angulo skerpi of stijl

Pa trapi di palo:
a) E material mester ta den bon calidad, e liña di e palo mester ta den su largura (“rechtdradig”).
b) E trapi mester wordo construi sigun normanan. Uzando klos of “inkeping”, distancia di e trede (paso) 25 cm. Uza 2×4 pa trede (paso), e pia nan mester tin bon grip ora para riba dje.
Pa balcon of opening/buraconan den vloer:
a) Vloer opening mester ta afgezet of tapa
b) E piso completo mester tin baricada pa evita e peliger di caida di personanan
c) Mester buta aviso cu indicacion di peliger di caida
d) Trahadonan mester tin safety harnass na tur momento bisti y mara ora cu ta traha cerca di e rand
Pa mashin cu ta draai:
a) Mester tin su capa di proteccion riba e mashin
b) Zaagmachine of grinder (“aan/uit knop”) mester ta traha
c) Mashin cu ta den mal condicion mester wordo saca fo’i uzo
d) Kabel di coriente no mag di ta pela of gelast na otro
e) Uza proteccion personal adecua ora ta opera e mashin
Extension Cord y cashi coriente:
a) Extension cord cu ta den mal condicion mester wordo saca for di uzo
b) Purba uza extension cord cu ground
c) Cashi di coriente mester tin su tapa
d) Tur stopcontact mester tin su tapa
e) Cashi di breaker mester tin un hoofdschakelaar, ground y ta den un bon condicion
f) Verlengsnoer cu mas cu 3 verbinding mester wordo saca for di servicio
Puntonan general:
a) Riba piso unda ta traha mester un baricada y cu su toeboard
b) No lanta material cu no ta wordo mara adecua
c) No ta cana bou di un grua ora cu e ta lantando of pasando material den halto
d) Mester pone atencion ora ta cana banda di hende cu ta cortando of welder
e) Tene cuenta tur ora pa loke ta pasa rond di bo persona
Uzo di proteccion personal (PPE’s):
a) Den construccion mester bisti un veiligheidshelm/safetyhelm
b) No ta permiti pa uza un “bumb caps” manera un veiligheidshelm (“hard hat”) den construccion
c) Mester bisti sapato di siguridad prome cu drenta den construccion (safety shoes)
d) Mester uza e proteccion adecua pa cada trabou
e) Na entrada di construccion mester tin e reglanan di siguridad y e proteccionnan cu tur trahado mester uza

IMPORTANTE: Riba tur proyecto mester tin suficiente baño pa trahado y dividi na sexo. E baño mester wordo haci limpi tur dia. Pa mantene higiena mester tin e facilidad disponibel pa laba man. Pa trahadonan cu ta break na trabou mester tin un mesa cu un afdak pa proteha di solo y awa limpi pa bebe.

Por manda pregunta via nos email [email protected] y Facebook page: Dienst Technische Inspecties. Por yama pa informacion na telefon 5845300. Ta pidi pa sigui e instruccionnan di DVG y e Task Force encarga pa controla e rekisitonan en conexion cu COVID-19.
SIGURIDAD NA PROME LUGA!