Omaira Lares, como director di Departamento di Recurso Humano (DRH) diabierna mainta a duna di conoce cu ta atende cu diferente departamento riba diferente tema. Si ta, por ehempel, pa un prestatie management, en enfoke ta riba esey so. Lares: “Con bo ta bay handle ora bo ta haya un departamento cu un bes pa aña so e ta wordo activa? Mi mes ta haya gan’i yora.” E director a confesa cu e ta kere cu coleganan cu tin cu atende cu tema financiero ta sinti mesun cos y mescos e funcionarionan publico cu si ta presenta y haci nan trabou. Asina mes, e director di DRH ta admiti cu ultimo aña tin un wowo mas skerpi riba kende ta traha na unda y pa ken e ta traha.
Lares a bisa cu e di dos pregunta ta uno mas emocional ora cu ta yega e momento di hereiking caminda cu ta encontra cu tin tarea cu no ta bay eherce mas, anto porta tin hende cu tin cu bandona servicio. “Laga mi pone asina’ki, anto con lo bay atende cu esakinan? Awel, den esey tambe diferente di e maneho strategico di personal cu tin traha flankerend beleid cu ta bay maneha y yuda nos pa atende cu e personal aki, mientras tanto durante e aña aki y durante e dos añanan cu ta bin, nos ta hopi manehando e instroom.”
Tambe a bisa cu poco poco ya caba ta bahando e cantidad di hende, creando espacio pa momento cu tin cu reemplasa hende of cu tin hende cu mester sali. Lares a sigura cu no ta no ta bay di un dia pa otro. Lo bin maneho cu ta dirigi e proceso ey.
