Den cuadro di tur acontecimento relaciona cu COVID-19 y e variante mas recien, esta Omicron, ta di suma importancia pa scucha conseho y informacion di un experto den e area di salud. Asina den un bishita den sintonia di Enfoke, Dr. Wilmer Salazar a splica cu e variante Omicron t’e mesun virus cu un diferente cara cu ta propaga lihe. Segun Salazar a splica, e variante aki tin un total di 50 mutacion den su structura y 30 mutacion den su ‘spike’, esta e parti central pa e por causa un infeccion.
A enfatisa cu no tin mucho informacion tocante e gravedad, ni si e ta altamente contagioso ni tampoco si esaki ta crea mas problema cu salud y si esaki por evadi nos sistema inmunologico. Locual si Dr. Salazar a tuma nota di dje riba noticia di Sur Africa di un pashent cu Omicron ta cu e virus no a afect’e severo y cu esunnan mas afecta ta e personanan cu no ta vacuna y cu e virus tabatin menos efecto riba esunnan cu si ta vacuna caba. Esaki ya caba por duna un tiki speransa cu ainda e vacuna actual por proteha nos di e variante aki tambe, segun e dokter a splica.
Diabierna ultimo OMS (Organisacion Mundial di Salud) a confirma cu e variante aki ta uno di preocupacion debi cu a detecta esaki na casi setenta pais caba, a pesar cu e cantidad di caso no ta mucho hopi. Entre esakinan tin Hulanda, Portugal, Spaña, Alemania etc. Tambe e dokter a splica cu motibo pakico tin preocupacion riba e variante aki ta debi cu tin similaridad den e mutacion cu e variante Beta, tambe procedente di Sur Africa. E ultimo aki tabata afecta mas tanto hende hoben.
Den tur esaki ta spera cu esfuerso di vacunacion lo percura pa mescos cu varios otro variante a bin y bay, esaki lo ta e caso tambe cu Omicron.
Pa cobertura mas amplio lesa edicion di TREMPAN mañan.
