Diaranson a tuma nota di un publicacion di DOW den cual ta informa usuarionan di “Riool Water Zuiverings Installatie” (RWZI) na Parkietenbos, cu nan lo ta cera pa motibo di mantencion. A propone pa esunnan cu mester basha awa residual na Parkietenbos, pa uza Bubali Plas na e planta di RWZI. A resulta cu e mantencion tabatin mas cos su tras. Intencionalmente RWZI a manda miles di liter di awa contamina den lama.
E aña aki mas biaha caba e sistema a daña y a manda awa den lama. Den e caso specifico aki, esunnan encarga cu mantencion a manda e awa sushi y contamina directamente den lama. Mirando e Mangrovenan ta dificil pa mira salida di awa. Asina mes a nota e parti sushi ta mescla den e awa di lama.
Algun hende cu ta frecuenta e area a alerta nos riba e caso for di momento cu a avisa cu lo tin mantencion. Pesey mes a lanta drone riba diaranson atardi 9 di Mei pa 4:28 PM pa mira e situacion di e tankinan. Djey a bay bek diahuebs mainta 10 di Mei pa 10:03 AM. Tambe Diadomingo merdia 13 di Mei pa 1:22 PM. Claramente por nota un diferencia den e tankinan. E awa sushi cu no a wordo procesa ainda den e tanki mas grandi tabata bay lama.
Naturalmente si e sistema no ta funciona, ta nifica cu hasta e lodo vies ta drenta laman. Ta cuestiona e superiornan, pa tuma semehante decision cu ta daña nos medio ambiente. E ehempel cu DOW ta dunando y haci e cosnan aki scondi ta condenabel. E area awo ta conamina pa via di dump y awo hasta dor di e awa sushi cu ta bay den laman.
E trabounan di mantencion ta bonbini, pero mester sosode den un forma responsabel. Mira e fotonan y asina bo por haya un idea completo di e cantidad di awa sushi cu a drenta e lama. Ademas di foto tin tambe varios video con tur cos a tuma lugar den nos file.
