Na e rotonde di Belgiestraat y Santa Helenastraat banda di e supermercado Wan Li a sosode un accidente entre un quardracer y un Ford Fusion color shinishi. Pa un motibo of otro chauffeur di e quardracer a perde control y dal contra di e Ford Fusion.
Agentenan policial tambe a presenta na e sitio pa haya informacion di kico a pasa. Den e impacto e Ford Fusion a haya basta sla y di un manera of otro e stuur di auto a kibra. Esey a pone cu e dama chauffeur di e Ford tambe a haya sla na su curpa y tabata keha di dolornan.
Polis a cera un banda di caminda p’asina e trafico por sigui move. E chauffeur femenino di e quardracer a ricibi sla na su pia, pero un par di bon samaritario a duna un man y mesora a yud’e cu e herida na su pia. E accidente aki a laga basta daño material atras.