E reunion di Parlamento diahuebs tabata pa trata un ley pa crea un fondo cu ta mitiga e retonan grandi cu Aruba ta enfrenta como pais pa loke ta trata e problema di inmigrantenan for di Venezuela.
Lider di fraccion di MEP Rocco Tjon a bisa cu hopi tempo caba nan a bisa cu ta mira e problema aki como un asunto di Reino, mirando e impacto grandi cu e tin. Asina Hulanda a pone 11 miyon florin disponibel pa optimalisa henter e cadena di stranheria y ehecuta diferente proyecto pa garantisa siguridad di frontera.
Tratamento di e ley aki a dura henter dia y a finalisa den careda di 4’or di atardi. Tur partido a bay di acuerdo cu e ley aki.
Fraccion di MEP tambe a pidi pa brinda curso y opleiding na personal cu ta traha den e cadena di stranheria, y proyectonan cu tin di haber cu infrastructura pa amplia e cantidad di espacio pa wanta personanan indocumenta.
A apela na e mandatario tambe pa percura cu tur personal cu ta traha den e cadena di stranheria haya e material necesario pa eherce nan tarea na un manera “safe”. “Ta importante pa inverti den proceso, pero mester percura cu e departamentonan di siguridad ta bon ekipa.” Minister di husticia a priminti cu e lo percura pa Guarda Nos Costa y Cuerpo Policial haya e material necesario pa e tarea di Kustbewaking y kustbeveiliging.
A puntra tambe pa personal di Warda Nos Costa, cu ta certifica caba y nan mester percura pa control na fronteranan, pone nan denter di e team cu ta encarga cu esaki, mirando cu nan tin scarsedad di personal.
Tur 18 parlamentario presente a bay di acuerdo aki. E ta contento cu gobierno a dicidi pa bini cu un ley, pa brinda mas transparencia.
