Na Sero Preto 14-J, den area di Pavia, dos unidad di polis a presenta pa un situacion cu a bay fo’i man entre suegro y yerno. E suegro ta insisti na polis cu durante e discusion, na dado momento e yerno lo a saca un arma di candela, un pistol caliber 38, y cu e lo a pon’e na su cabes.
Henter discusion tabata door cu e tata a reclama e pareha di no ta aporta cu nada den cas, cu e no tin trabou y no ta haci nada. Mas leu e suegro a keha na polis cu e yerno ta paden di cas y cu e tin e pistol scondi.
Polisnan presente a tuma declaracion di ambos partido. E otro declaracion duna ta bisa cu e yiu muhe ta na estado y e tata a yega cas burachi. E tata a cuminsa un discusion cu e yiu muhe. E pareha di e yiu muhe a sigura polis cu e no tin arma di candela y tampoco el a pone na cabes di e suegro.
Despues di a tende ambos partido, polis a detene e tata pa haci un denuncia falso. E tata ta mantene su declaracion cu e pareha di su yiu a saca arma di candela p’e, mientras cu polis a busca e arma pero no a haya nada. Polis a controla den auto di e yerno pero no a topa cu e supuesto pistol caliber 38 cu e lo a saca pa e tata.
