Jurette Croes, encarga cu comunicacion di Departamento di Salud Publico, a papia di e ultimo desaroyonan riba e tema di COVID-19 na Aruba den e conferencia di prensa di awe merdia.
E cantidad di casonan positivo a keda na 50. A haci 634 test, di cual 584 a resulta negativo, mientras cu e cantidad di persona den cuarentena no a keda actualisa ainda. A constata cu e edad maximo di e pashent positivo ta 74 aña mientras cu esun mas hoben tin 11 aña. A keda confirma tambe cu tin dos persona interna den hospital. Ningun di dos ta grave, pasobra nan no ta den ICU y tampoco ta na aparato pa hala rosea.
Di e total di casonan cu tin registra na Aruba, 4 ta caso importa, 21 caso ta local, mientras cu tin 15 caso no ta bon identifica si ta importa of contagio local.
Tipnan duna ta pa keda na cas mas tanto posibel. Sali solamente pa asunto di salud, alimento te cu dia 20 di april, y si sali no mishi cu wowo, nanishi of boca. Na momento cu yega cas bek, tuma tur medida di precaucion di limpiesa, labando mannan y cara bon, of uza alcohol di 70%. Esnan cu test positivo pa COVID-19 mester keda cas y protege tur hende.
Ir. Edwin Jacobs, director di Banco di Seguro Social di Aruba (SVb), tambe presente den e conferencia, a splica cu Aruba a pasa den dos crisis grandi, esun financiero unda cu SVb a perde un grupo grandi di cliente. Den e crisis actual, esaki a keda manifesta atrobe. Pero contrario na esun di pasado, esun actual ta uno agudo. Anteriormente e perdidanan di cliente tabata sosode di forma paulatinamente ora cu a drenta e situacion y e biaha’ki e ta tuma luga di forma di repente.
Tambe Jacobs a splica cu for di momento cu a introduci shelter in place, a acelera e proceso pa paga e diferente tipo di pensioen- y compensacionnan cu SVb mester a paga y esey a tuma luga.. Proximo riba lista ta esnan cu ta haya un compensacion di malesa directamente for di SVb pasobra nan a wordo retira. Esaki lo tuma luga pa 9 di april.
Maneho di Shelter in Place di Gobierno ta pa mantene ciudadanonan na cas y solamente a haci excepcion pa algun servicio cu ta escencial pa comunidad. Pues por sali pa haci uzo di solamente e servicionan escencial. E organisacionnan aki mester mantene un ocupacion minimo.
Nan tin algun servicio cu lo sigui via di e sistema online. E notificacion di AO ta cambia, pasobra 95% di nan aseguradonan mester ta na cas y nan no por bay SVb pa control, pero ta haci un apelacion pa haci esaki via di e dunado di trabou. Di e forma aki ta duna proteccion social na esnan cu si mester sigui traha.
Cesantia ta e derecho cu e trahado tin si e wordo retira sin cu ta su culpa. E prome pa cumpli cu pago di cesantia ta e dunado di trabou. Si e doño di trabou no por paga, e ora SVb ta paga.
Ley ta papia di 3 momento cu SVb ta paga e cesantia. Esey ta si e a bay bancarota; si e empresa a haya suspension di pago; 3) si e compania a stop di paga. Pero mester pasa den buki pa mira cu e compania no por paga. E casonan awo di work no pay mester wordo paga door di dunado di trabou, Jacobs a splica.
