E fin di siman aki Hulanda a conoce dos caso fatal mas relaciona cu e Coronavirus. E cantidad di mortonan a subi awor na tres. E cantidad di pashentnan cu a test positivo pa Coronavirus subi cu 77 caso mas, alcansando awor un total di 265 pashent, asina Rijksinstituut voor Volksgezondheid en Milieu (RIVM) a duna di conoce awe diadomingo.
E dos pashentnan cu a muri e weekend aki tabata interna den Bernhoven Ziekenhuis na Uden y tambe den Zuyderland Medisch Centrum na Sittard-Geleen. Ta trata aki di dos hende homber, di cual un tin 86 aña di edad y e otro tin 82 aña di edad. Di acuerdo cu departamento di salud publico di Hulanda, ambos victima tabata sufri di un condicion malo di salud, prome cu nan a contagia cu e virus. Awor aki ta investigando con nan a pega cu e enfermedad.
Di e 265 pashentnan contagia cu Coronavirus na Hulanda, un total di 144 tabata di biahe na Italia y ta sinti cu a pega cune eynan. Awe e Departamento di Relacionnan Exterior di Reino Hulandes a cambia e “reisadvies” pa e paisnan contagia cu e virus, den cual ta urgi Hulandesnan pa abstene nan mes di e tipo di biahenan asina si no ta pa un motibo urgente.
Te cu awor, mayoria di e pashentnan ta den isolacion na nan cas mes y ta biba na Noord-Brabant. Rijksinstituut voor Volksgezondheid en Milieu (RIVM) a conseha habitantenan di e provincia ey diabierna ultimo cu si no ta necesario, pa nan NO sali di nan cas, den caso cu nan ta sinti nan curpa malo cu keintura, tosamento y verkoud.
Tocante Coronavirus
E virus a nace y cuminsa na Wyhan, na China, na fin di aña pasa y entretanto a infecta mas o menos 109 mil hende mundialmente. Di acuerdo cu World Health Organization (WHO), a raporta e enfermedad den mas di 90 pais caba y e nivel di morto pa motibo di e enfermedad ta mas di di 3800 pashent. Ta bon pa menciona cu mas o menos 61 mil pashent a recupera di e enfermedad.
Locual Bo mester sa di Coronavirus:
- E virus ta plama dor di tosamento y niestermento, pues via aire
- Esunnan cu no tin sintoma no ta un peliger tampoco pa pega cune of pega otro
- Cada pashent infecta ta pega un averahe di 2 pa 3 otro persona. E cifra aki por baha si preveni mas posibel
- Mayoria pashent tin keho di sintomanan di griep
- Casi tur caso di morto dor di Coronavirus ta di hende cu edad halto of cu tin un enfermedad cronico caba
